有食唔食……啲字 唔一定罪大惡極
阿彌陀佛，善哉善哉。
上個禮拜睇報紙，見到寶蓮寺宣布會搞第二屆慈善越野跑比賽，心諗：好事呀，健康又正氣，但係一睇個活動名，唔好意思第一個反應係笑，笑到出聲嗰隻。
個賽跑命名為「佛你跑」，英文名Buddha You Run，感覺好google translate，爭在未知係中譯英定英譯中。而除咗親子、長者呢啲組合跑之外，今年仲鼓勵夫妻同跑，就叫做「佛你太太跑」。
「哎呀我眼睛業障重，假的」，對岸海濤法師肯肯定咁講，然後繼續打坐「阿彌陀佛」。
利申，只談宣傳不談宗教。呢個「佛」字，我見識少，無咩見人用嚟做動詞，食字嚟講，同音字最常見常用嘅，應該係「罰」。「罰你跑」，聽落好似好風趣，實質同個活動無咩直接關係，都係想鼓勵市民參與行山跑步運動啫，突然變成懲罰，真係我佛慈悲，今次仲要罰埋自己太太喎？
食字都要有意思
咁當然，好似我呢啲好事又無恥之徒，就不其然會諗下，如果係用英文去諗呢件事……小孩子不懂便算。
我唔知主辦人係咪有心要食字，如果係，與其用「佛」，不妨考慮下用個「釋」字，「釋跑」，起碼聯想到「識跑」嘛。如果話睇完令人印象深刻，或者都算係好廣告啩，我估。
講到食字，香港都興咗好多年，廣告好公關活動好，大家坐埋度個名，總係要食個字落去先心息：同耶穌有關嘅就加個「神」字、同食物有關嘅就加個「味」字、唔牟利嘅就多啲「愛」多啲「善」，想拖人落水嘅就唔該用多啲「你」同「我」字，咁當然最緊要係植入式加返個brand name入去活動名啦。
於是一大堆「與眾筆瞳」、「泰好玩」、「悅換悅開心」……眼睛唔止業障重，就嚟生癌。
好似「筆瞳」，係用嚟推介某部手電附設嘅手寫筆，但係呢兩個字組合本身就成唔到咩意思，只係為左食「與眾不同」去夾硬換個字出嚟，我只係諗起宜家好HIT嘅PPAP：I have a pen，I have a pupil，兩手一拍，有夠血腥。
要解釋不如唔好食
又好似之前有個活動叫「我係沸青」，聽聞係想扭轉大眾對「廢青」嘅誤解，只要活得夠沸騰，就可以成就無限可能咁。但係其實，有幾多人會鍾意同人講自己係「沸青」先？講完再一大輪嘴解釋自己係「沸騰」個「沸」？如果食字無法子直接帶來正面形象，咁做咩要咁辛苦諗一大段背景去成全呢一個「沸」字？結論係有幾多人承認到呢個「沸青」新定義？
再數，當然唔少得一大堆食字戲名，「無限耆」呢啲我都算，見親SPACE呀TIME呀就總係見到「兇間」，其實有幾兇？或者度名嗰位個腦有幾空？呢啲食字，十次有九次都係「硬食」：佢夾硬食字然後我無辜硬食。有次做嘢我問agent，喂，其實有無咁餓，下下都食字？
「吓？做開係咁啦，你老細又收貨，快靚正嘛！」除左快，我真係好少見後面兩位朋友。快，或者代表有效率，不過都係敷衍嘅一種借口。食咗，就當自己做咗，唔理係客定AGENT，太多人選擇去懶，結果咪搞到食字咁濫，慢慢劣幣驅逐良幣，濫變爛。為食而食嘅結果，係無咗宣傳重點而只得返一句騎呢怪話。
好多朋友以為食字易，唔錯得哂，順手拈來嘛，但係要夠精夠銳就好講火喉同創意。中文博大精深，一字多義再加埋幾萬款同意同義字，配搭真係千變萬化，要玩字，麻煩真係諗多啲新意思。或者最起碼，個新生字詞本身係咪解得通先？狗屁不通固然得啖笑，生出歧義搞到讚變彈，或者畀人笑番轉頭甚至得罪人，「這，就是7」。
外國宣傳一樣會玩食字玩pun，但係好多業界人士對Cheap Pun同樣嗤之以鼻，早排睇過一篇文就話，新人一入行要係咁出pun無可厚非，但係慢慢你就會發現呢啲靈光一閃嘅pun根本無營養，“Pun-free is always the way to go.”
不如，畀心機諗句經典Tagline同主題：“Just Do It”,“Think Different”,"Because You're Worth It"，「鑽石恒久遠一顆永留存」我到今日都仲記得，一講星光熠熠就自然會諗起保良局，係好嘢自然有得留低，唔一定要食食食嘅。
行家們，如果依然堅持「爆食」，唔該啜核啲，改到好似三級片咁引人入勝咁精彩：「豐乳同露」、「誘窺誘舉」、「無堅不吹」、「每當變硬時」……每次睇報紙睇水牌見到一大堆「硬食」，我都真係會變硬，個拳頭。
（本文純屬作者意見，不代表香港01立場。）