【三個傻佬學煮餸】無花果醬脆皮烤鴨，敬楊學德，好Duck！

Jim與漫畫家楊學德，相識微時，沙煲兄弟，共過患難。今次楊學德話要食Duck，Jim少傾盡全力烤鴨，務求有脆皮乳豬效果。

阿Jim真係好「神心」，四出求教，搜尋食譜。咁啱佢同大廈看更大叔搭訕，先知對方係老師傅，仲醒咗阿Jim幾個心得。

一、風乾
二、僻酥
三、僻油

鴨油酥膩，有礙健康。一般可滾油炸，鴨皮微焦即可蒸煮。阿Jim從此入門，研發烤鴨奇招。

我們旁觀，發現阿Jim近日「撻着咗」，不停在家磨劍練功，單是去骨起肉，已經用了幾隻鴨開刀，有時深夜傳來短片，原隻肥鴨，刀光劍影之下，三兩下散手，變成一塊扁平淨肉，皮肉無骨，鬼斧神功，好一個深夜屠夫。

刀功練好，再鑽研僻油絕技。先風乾鴨皮，以麥芽糖加白醋塗表皮三四次，用西蒜薑葱墊底，大火烤焗，一來可逼出鴨油，二來可把鴨皮焗脆。大家一起圍爐取鴨，見鴨皮金黃，都起哄喝采。

此外，Jim又靈機一觸，想到用無花果攪拌成鮮味醬汁。楊學德一邊啖鴨，皮肉脆卜卜，一邊回味他與阿Jim年輕時，在窩居天台看夜空，流星劃過，咔察一聲，來不及許願，已經是二十多個寒暑，兩人如今人到中年，腳步慢下來，細味脆皮鴨的味道與聲音。

 || 無花果醬烤脆皮鴨 || 

烤鴨做法：

全鴨去骨，頭尾不要，用雪利酒或花雕洗鴨浸20分鐘。
陳皮磨成小粒，混入五香粉、鹽，用來塗鴨。
把鴨放入雪櫃，烤前8小時，拿出來放在室溫下風乾，再以麥芽糖加白醋塗表皮三至四次。
把西蒜、蔥、薑及陳皮放在焗盤底，放上鴨之後入爐焗。
先把鴨放於爐中間用170度焗20分鐘，再把鴨升高鴨至焗爐上部位置，以200度把鴨皮焗脆（時間視情況而定）。

醬汁做法：

無花果切小粒，放入攪拌器攪拌成醬，
加入以1:1 比例的蜂蜜及意大利醋，少許橙酒及蘋果味Cider即成。

小貼士：

鴨要放在室温風乾至少3小時
要鴨皮脆，焗的時候要將鴨稍為放高，讓鴨油流在焗盤底

（文章純屬作者意見，不代表香港01立場。所有相片由作者提供。）