放唔到工的原因

明明你只係想做好本份，準時返工、放工，遠離辦公室是非。但一樣米養百樣人，總有啲人係唔阻住人唔安落，點解啲嘢做極都唔完？好多時唔係份project複雜，更加唔係你辦事能力低，而係總有以下呢啲人……

  1. 遇上認真L　認真累街坊

一條team總有一兩個好用心工作嘅人，用心到……令你無奈。因為你心知佢係善良人，佢唔想害任何人，只係認真工作但又無主見，想件事做到「最好」，不過佢又唔知點先係最好，所以就喺同一個位不停試、不停試、不停試、不停試，結果件事就進展得好慢。正常人用3個鐘對一盤數，佢用5個鐘去對。如果佢係文科人就仲大鑊，一篇新聞稿，佢逐隻字同你細味，仔細到某行字應該用逗號定句號佢都同你討論廿分鐘。

個客已經將個Design改咗萬七次，又唔係咩大改喎，每次就改少少，改兩行字，試吓擺左啲，然後下轉又移返右啲，個底用紅色？黃色？最後話要粉紅色，好啦以為佢收貨，你一output file，佢就話隻粉紅色要淺少少。少少？即係幾少？結果你又做多個幾鐘。

  2. 我的字典裏沒有「放工」

對唔住，呢類人真係好多係年過30又無家庭嘅女人。死唔放工嘅原因包括上述——佢太用心工作，盡善盡美，正常用8個鐘做完嘅事佢要16個鐘先研究完。

而深層啲嘅原因就係佢悶。

放工無人約，又不屑返屋企睇師奶劇，留喺公司搏上位又好、畀人覺得佢好忙、公司無咗佢唔得都好啦，總之工作係佢生活唯一樂趣、唯一得到滿足感嘅事。佢投入到，都唔記得交份嘢比你嗰陣已經係6點，佢無心留難你，只係佢唔記得人生係有「放工」呢回事。

遇到以上兩類人，就只有無奈，但有種人死磨爛磨，因為香港人眼中「OT＝勤力」，佢純粹唔想做第一個放工嘅人，而且佢約咗人食飯未夠鐘，當你忙到放唔到工，但佢明明無嘢做又唔走，喺度行來行去，見到呢啲人留低扮OT真係好想打佢。

  3. 天生奴隸　志願賣身做太監

乖寶寶，老闆叫佢做咩都做，遇到任何不公都唔敢反抗。同事W，每朝都會主動幫個senior officer拎飯盒去pantry雪，無人叫佢做，佢自己做，重點係個senior officer成日呼喝W的，有時仲會叫W lunch time出去幫佢買奶粉比個女。有一日我忍唔住問W，其實個senior有手有腳，可以自己將個飯盒放入雪櫃吖，點知佢話：

「唉，算啦，呢度算好好，我喺舊公司個老闆仲變態，只係畀半個鐘我哋lunch，我仲要幫佢買完外賣先可以開始食，有時遲咗少少落街，餐廳排滿人，我就用廿分鐘幫佢買外賣，十分鐘自己食。」

哦！原來佢慣咗行奴隸制。

不過佢自己做奴隸關我咩事？無事發生嗰陣就影響唔到人，但當老闆提出不合理要求，大家想團結一齊唔執行，奴隸就會壞哂成件事。

仲唔明？你睇吓香港，有人為你同你下一代嘅民主、自由而瞓街、被人打，總有一班乖寶寶出嚟話唔好搞事，要聽話先有得繼續撈。

  4. 惡人先告狀，你要收工，所以我無得收工？

呢啲人唔知咩事，你一叫佢做嘢，佢就會惡咗先，通常佢都係account或者admin果啲嬸嬸。

「唔該…張票出到未呢？vendor追咗兩個月，我哋又要搵佢幫手做下單project啦，上單都未找數好難叫人做嘢…」

你有禮地問，佢一定係大大聲鬧咗先：

「痴線！好等錢洗咩佢？有生意唔好接吖笨，我大把嘢做，未得閒出佢張票呀！」

明明係欠人錢嗰個，但可以咁大聲，真係無恥便無敵，結果你就要浪費時間去同vendor解釋，仲要無辜地講唔好意思。

如果佢係你直屬上司，就更加灰，上司話：

「你同佢講，另一間物流公司個價比佢平5%，如果佢唔減，我哋就轉用另一間公司。唉，唔明你點解搞咁耐都講唔到個價返嚟，等我自己同佢講。」

結果，阿上司高高在上咁打去叫人減價，人地真係唔肯減，你焗住轉用平啲嗰間，但一分錢一分貨，間新物流又遲到又態度差，有屎嗰陣咪又係你食，進度又這樣被拖延了。

做嘢啫，唔使小小事就「起弶」嘅，學子華神所講：「你一出世就更年期！」咁會累街坊㗎你明唔明呀……我只係想放工咋！

（本文純屬作者意見，不代表香港01立場。）