公司毒瘤影響大？公司垃圾更可怕
拜讀了蔡東豪先生的專欄《清除公司毒瘤 由請人開始》，他提出一條企管定律：一個毒瘤的為害抵消三個superstar的貢獻，即係唔好睇少廢柴同事的禍害（佢講得斯文好多，無我咁毒舌）。我驚訝原來有管理層明呢個道理？作為一個前線打工仔，真係貼住個地明白垃圾員工有幾阻礙進度、有幾打擊士氣。可惜，好少離地管理層願花時間處理呢個問題，他們的時間得花在公司整體營業額、策劃公司整年方針，我們這些微塵開唔開心、辭職的真正原因，點得閒問？管理層唯有信下一兩層嘅「得力助手」，例如經理。
我所說的「垃圾」，跟蔡先生指的「毒瘤」有點不同，「毒瘤」是有威脅的、頑強的、無益但有力的；「垃圾」是除了堆填就只能靜待回收。
垃圾是怎樣煉成的
不少大公司都着重年資，要升職，一定要服務夠十年八載，這樣培養出大量「不求有功但求無過」的經理——通常佢哋一畢業就入到一間穩定嘅公司，諗過走但唔敢離開comfort zone，同一間公司一做就十年、廿年，換來一個經理位，然後就很滿足了。廿年嚟都無乜進步，因為個規則只係「鬥坐得耐」同「唔好畀人捉痛腳」，所以唔學新嘢、唔試新方法，一直用廿年前嘅方法就包無死。我做過一份工，公司文化鼓勵大家長期服務，所以做夠3年升Senior，做夠8年升AM是枱底共識。原意雖好，但執行卻有心無力，這機制令公司充斥大量經理級垃圾。
有PR經理竟然問「咩叫RTHK ？」、「乜嘢係KOL？」、「邊個係彭于晏？搵佢代言好咩？無人識喎」；
E-commerce經理：「乜嘢係Facebook live？直播？有咁嘅嘢咩？即係好似明星咁做電視呀？嘩我哋唔夠人手，唔好搞。」
下屬幫上司補習 愈補愈灰心
我無吹水、你亦無睇錯，佢哋真係連入門ABC嘢都唔識，喺佢哋屬下嘅微塵們點會唔灰心？PR微塵想propose pitch RTHK一個節目訪問，幫公司宣傳吓，竟然要由「咩叫RTHK」開始解釋，佢唔識RTHK，你更加唔好期望佢會知港台有咩節目、節目風格同個Product有幾夾、主持人有幾出名、Pitch到之後個PR Value有幾多、幫公司慳咗幾多廣告費……想主動、想積極，但喺幫老闆補習期間，微塵已經心力交瘁，因為呢類補習唔係間中一單，係你每次propose新嘢，都要袋一袋錢入佢袋先。
想怪個經理？其實佢都慘豬，廿年前彭于晏得13、14歲，PR經理唔識佢好正常；E-commerce經理唔識Facebook function？喂佢後生嗰陣都未有互聯網，公司要佢管網上商城，但佢本身未試過online shopping，佢都好無辜。係！我曾經用以上原因安慰自己，要多體諒別人嘛，畢竟我也只是廢青一個，無咩特別叻。
唔識唔緊要 無心改進罪無可恕
但日子愈耐，愈發現佢哋真係公司垃圾！公司畀得個部門你睇，你係咪應該盡快pick up部門知識？你唔知RTHK係咩，點解唔查google，反而等下屬餵你？糧又唔係你出，你無交學費㗎！下屬用working hours教你嘢，你剝削緊公司資源！做得E-commerce，理應長期開住個Facebook，有咩新功能你唔係第一時間知㗎咩？都未同你計Weibo、WeChat嗰啲啦，你唔識去搵online marketing書睇？
而家講緊嘅只係相關部門最最最基本嘅小小小事，連少少好學精神都無，只想安安穩穩坐喺度，少做少錯，唔做唔錯，根本就無尊重過自己個職位、部門。遇有大型啲嘅Project點呀？直接隊俾細嘅做囉，錯咗就鬧下面：「而家啲後生做嘢真係唔仔細。」掂咗就以為自己帶得好。
如是者，劣幣驅逐良幣，下層儲夠經驗就辭職，一條Team不停有人走，剩低落嚟嘅，士氣只會愈來愈差，無心工作死磨爛磨，磨夠一兩年，CV好睇一點就走。有志氣嘅人走哂，留低的就是……
劣幣驅逐良幣 不倒垃圾會污染環境是常識吧？
我廢青真係唔明管理層諗咩，同一個經理手下嘅微塵係咁走係咁飛，都應該估吓嗰個部門出左咩問題啦？但估吓又唔查吓，查到又唔敢執走舊垃圾，因為舊垃圾喺公司資歷耐，炒老員工的代價有點大吧？垃圾抱住唔做唔錯嘅心態，佢根本乜都無做，咁又點捉到佢錯？又無令公司蝕大錢，算啦多一事不如少一事。
而其實，垃圾無令公司蝕大錢，但可能令公司少左好多賺錢機會了。
我同意治本應由請人開始把關，避免將垃圾帶入公司，但有不少廿年前剩落嚟嘅垃圾，又可唔可以清清佢呢？
相關文章：有無諗過，裸辭之後喺香港working holiday？
（本文純屬作者意見，不代表香港01立場。）