【怪工奇遇】豪裝office、靚女員工　公司主業係唱K打邊爐

大家仲記唔記得，5月嗰時有單「中澳法學交流基金會訪京團艷照事件」？一班愛國法律人士為一帶一路、法律交流而組團訪京，點知流出兩張貌似喺夜場影嘅「艷照」——訪京團員攬住衣着性感的女子合照。事後外界質疑該團真正目的及貢獻，仲有就係好奇「中澳法學交流基金會」究竟係咩機構？點解設喺香港？
其實香港仲有好多你想像唔到同香港有咩關係嘅會。我喺香港working holiday嗰年就做過一間，作為一個土生土長香港人，果幾個月真係令我覺得去左另一個世界。

【相關文章：有無諗過，裸辭之後喺香港working holiday？】

嗰間係一班大陸人組成嘅非牟利機構，專幫同行商家們尋找商機：提供行業資訊、組織交流團返國內探訪、互相幫助、友愛共存啲Friend……見工嗰陣佢係咁講嘅，當時我見工之意不在工，最緊要有糧出住畀我創業就OK，所以做住先。

個office喺香港樞紐中心，落地大大大玻璃望海。全層大約二、三千呎，但職員數埋就只有五六個。有日，個阿叔（Office最大嗰個）話公司人太少好悶，決定請多一個女仔。咁佢就叫身兼HR、Account、秘書嗰位同事C出廣告請人。個post人工20K起，需要大學畢業，主要職責同公司所有人一樣——坐喺度。

CV收到了，所有無相嘅CV佢連望都唔望吓，最後挑選咗幾個樣子娟好嘅少女來見工。

阿叔每次interview都同應徵者講：

「我哋呢個表面上係會議室，但你一按檯底個掣就會變成火鍋檯。好勁㗎，成萬蚊搵人訂造，我示範畀你睇。」

一按，嗰張放緊form同cert嘅檯就會好似transformer咁樣向東南西北四邊伸展，阿叔拎起中間塊木，繼而有個電子爐喺中間升上嚟。呢個時候阿叔就會開門大叫，話開埋個強力抽氣扇，成套demo做完就同應徵者講：

「咁第時我地啲會員嚟到，你哋幾個女仔就夾手夾腳開檯、開抽氣扇、買汽水、切肥牛畀會員打邊爐。佢地會打到好夜，不過你哋放低食物就可以放工，唔使OT嘅。」

有次開唔知乜嘢大會，用最大嗰間「會議室」，有成900呎。阿叔叫我哋準備好多食物，仲安裝咗一部卡啦OK唱相思風雨中。幾十個西裝骨骨、講普通話的中年男士嚟開會，食完嘢就叫我哋幾個香港籍、170cm都無嘅工作人員出去，佢哋要開會了。但隔咗陣，阿叔帶住幾個又高又靚、目測最少腿長42吋的短裙女子嚟咗，入咗會議室……期間我哋幾個短腿女同事，膽生毛出出入入扮執文件，期間所見畫面就同「中澳法學交流基金會」嗰幾張相一樣，當然就唔係幾十個會員都做緊同一個畫面，有部份啦。

私人地方唱吓卡啦OK，攬攬合照吓其實無咩驚訝，但香港咁多呢啲會，設喺度嘅目的係咩？既然係非牟利，錢又從何而來？我反而驚訝「訪京團」後無記者追蹤落去。好多會的榮譽顧問都不乏香港人熟悉的名字……選舉臨近，奉勸所有會的顧問和會員都係唱少啲歌、影少啲相，美好回憶，留喺心就算啦，無謂要個老婆拖手出嚟講信任你，「訪京團」主角最後如何被建制割席，你懂的。

（本文純屬作者意見，不代表香港01立場。）