【白色強人】一件T-Shirt背後隱藏動人故事　馬國明：親情係無價

轟動全港的「安心事件」發生至今已一個多月，馬國明完成《降魔的2.0》拍攝後，要開始為下周一（10/6）首播的新劇《白色強人》宣傳。前晚（3/6）他着靚靚現身於九龍灣國際展貿中心舉行的劇集首映會。於新劇中再一次演醫生，馬國明坦言心情緊張：「之前《On Call 36小時》飾演神經外科醫生，今次係心胸肺科醫生，咁所以有好多嘢都要由頭學過，而且我都好耐冇出劇，對上一年都係出過一部劇集《深宮計》，今年呢部都算係我出嘅第一部劇，其實我都拍咗好多嘅，不過公司擺咗喺度未播啫，睇下幾時會播啦！」

馬明透露手頭上所有劇集都拍攝完畢，稍後便會北上登台出席商演活動，表示未有打算休息，希望可以趁機增加收入，幫補家計，為家人的將來生活可以得到保障，原來背後動力來自他與母親的一段往事，談起此事，馬明兩眼通紅感觸說：「好記得當時自己讀緊書，我買咗一件價值過千蚊嘅T-shirt，有一日媽咪唔小心將我件衫染咗其他顏色，之後我發晒脾氣好惡咁鬧佢，有一個深刻嘅畫面我仲好記得，又好深刻，就係見到我媽咪踎喺浴缸度用手幫我洗個件衫，個一刻個心好痛，自問點解要為咗件衫，發咁大脾氣去鬧佢呢？」

馬明續說：「親情係無價，件衫污染咗咪買過件囉，到人大咗更加會知冇嘢可以替代到媽咪屋企人，咁所以係要經歷一啲嘢，你先會知道一啲嘢令自己成長，咁當你失去一啲嘢嘅時候，係會一定追唔返，咁所以我宜家會好珍惜同屋企人嘅關係，會去報答佢哋。」

雖然只是一件與媽媽的生活軼事，但對於馬明有很深的感受，他亦曾經為這事向媽媽道歉：「我記得同媽咪道歉喺係屋企嘅，好似發生事之後，隔咗一日左右啦，我就鼓起勇氣同佢講對唔住，但詳細唔記得喇，好似大家都有攬住，但冇乜點講嘢，我諗一切盡在不言中，我道歉嗰陣，我記得媽咪都冇嬲我，雖然係我唔啱，但我諗屋企人就係咁偉大，但嗰個moment都幾感動。」

點擊睇馬明有幾慳家