周秀娜VS雞排妹　女神對決之公關特技

香港台灣兩位寫真界女神，論身材鬥樣貌算係各花入各眼平分春色，不過當噚日兩位同時喺FB上玩咗一手公關特技之後，就當堂高下立見。

先講香港代表周秀娜，噚日晏畫點零鐘喺FB出Po，話自己終於有得玩話題王Pokemon Go，仲預告定下晝會獨家率先Live玩港版「Pokemon Go REAL」，叫Fans到時睇佢Facebook Live。

嗰４個鐘頭無論係對娜姐粉絲定小精靈粉絲嚟講，肯肯定漫長過等發叔。而當時有唔少仍然保有理性嘅網民，並無盲目咁all in娜姐，一來連續幾日食白果有咗狼來了心態；二來客觀上連日本都未推出隻game，對香港優先抱有保留，佢哋已經留言溫馨提示左娜姐：睇路喎，唔好亂吹水呀。

結果畀預定時間遲左3分鐘，娜姐嘅真．Pokemon FB live無走數出現，之但係大家見唔到電話，見唔到VR裏面一大堆小精靈，而係見到娜姐自己變左做真．比卡超，著住套黃衫周圍走喺度「比卡比卡」，同市民玩互動遊戲。

陰公，娜姐個精靈球一拋出去，捕捉到嗰隻就係紅面關公獸外加過萬個嬲（寫稿呢刻有10189個），有報紙即刻搵佢問回應，佢話：

「我同大家都等咗好多日冇得玩，咪惟有自己同自己玩先。」

結果真係玩死咗自己。

又嚟不客觀分析時間，點解個反彈會咁大？

娜姐早喺上個星期六，已經出個PO話自己好想玩Pokemon Go，粉絲觀感會認為，佢本身係玩家，亦都好清楚Pokemon Go呢幾個字係代表緊一隻至潮VR game。當有公司想借呢個名號去做病毒行銷時，以娜姐智慧，無理由判斷唔到咁做會造成極大嘅認知落差，甚至畀人覺得佢講大話。
 JOB已接，雖然細節條款唔清楚，但係公司做Viral都係想件事spread出去，娜姐同佢團隊當時應該諗：頭就濕咗，點樣寫個po可以食住比卡超條水同時，又唔好畀人以為同隻game直接有關呢，例如可唔可以話，「呢輪比卡超咁旺，大家又等咗好耐，與其dry等，不如等我go real送眼晴冰淇淋」！
 結果無，而個po劈頭就係話「我終於有得玩Pokemon Go喇」，正如第1點所述，大家認為妳講緊嘅係隻GAME，就算你事後考慮用「港版Pokemon Go REAL」去兜話係食字，觀感上都已經覺得係「你呃人」。
 由始至終，隻game幾時登陸都係空穴來風，靠網媒或者網上訊息去推算，一直無官方一錘定音。娜姐貴為網上icon，當佢話自己率先有得玩而又因為要做宣傳方法而無去詳細解釋嘅時候，大家就會推算佢係官方代言人，個消息亦都成為多日吹風而來唯一一則具權威性嘅消息，所以反彈亦變得更大。
 最後，娜姐團隊，似乎都仲係低估咗大家無game玩嘅怨恨。

除左娜姐，做商場marketing嗰個自己要諗下，想抽人氣icon水，要夠爆又唔諗清楚個內容點做，為咗求快，結果度出一條病毒屎橋，人氣谷唔到仲畀人話你出手低，真係唔慌唔大腦受感染囉。至於娜姐，道歉嚟講要露出某部分難度就唔大嘅，係諗下點樣化危為機，度返條橋顯示智慧。

至於台灣女神雞排妹，對於死忠香港男fans朱先生嘅「愛得太早」，只係巧手四兩撥千斤，先發一句「朱先生太可愛了！」，再來安排同事送書畀佢，連消帶打再補多一下：「香港簽書會如果他有來，我要跟他合照！」嘩，真係生活滿希望到一個點！人氣加分亦幫寫真做宣傳，真係標準示範。

講到尾，大家個分別喺邊？喺個心度呀！黎天王之前咪示範左咩係誠懇真心囉。

（本文純屬作者意見，不代表香港01立場。）