鄧月平搭的士慘遭司機偷窺　IG大鬧對方黐線佬

擁有36F驕人身材的鄧月平，靚女出街多人望好正常，不過如果係唔禮貌嘅偷窺就接受唔到喇！今日鄧月平就喺IG Story 鬧爆有的士司機𥄫佢裙底，仲話好想開聲叫司機轉道去差館。

鄧月平聽日就21歲生日，估唔到生日前夕發生咁唔愉快嘅事。（IG圖片）

鄧月平喺IG Story 上載佢所乘坐嘅的士相片，寫道：「我係咪應該轉道去差館，個司機瘋狂『裝』（偷看）我裙底，拍片又錄唔到，但會嘗試再拍，全程龜速無車都Keep 住慢駛，痴線好恐怖裝鏡仔昅（𥄫）裙底。」從相片所見，個的士司機真係除咗車廂內嘅中鏡之外，仲裝多塊鏡，但唔知係咪真係用嚟偷窺女乘客。

之後鄧月平再出Po，話坐咗去司機後面，等佢𥄫唔到，仲激動到鬧的士司機係「死痴（黐）線佬！」鄧月平電話回覆《香港01》，話當時手足無措，「唔想同佢講嘢，因為都驚，盡快落車走人！」