將軍澳貓主人新屋搬傢俬走失愛貓 「初時以為佢匿咗入衣櫃」
昨晚（10日）八時許，貓主人Esther與丈夫把新添置的家俱搬進將軍澳寶琳新屋，當他們忙碌過後，發現一直安置在房間內的三歲唐貓女「呵力」離奇失蹤。他們搜索大廈各樓層後，仍找不到呵力，至今仍下落不明。
貓主人Esther接受《HK01》訪問時指出，「我有六隻貓。我地仲未正式入伙，不過我預先將貓搬入去適應。我知道尋晚要落樓搬傢俬，所以將糧、水、貓砂盤都搬晒入房，六隻貓我都放咗喺房，閂咗門先再出去。」有多年養貓經驗的Esther，明白貓貓對環境變動非常敏感，為了讓牠們早一點適應新環境，便預先把貓送到新屋裡。搬家具前，亦先把貓放進房裡，避免牠們走失，沒想到呵力仍然在房內莫名地消失。
愛貓在新屋離奇失蹤
她到目前為止仍不曉得呵力為何會走失。「我覺得好奇怪，我哋搬完傢俬之後，我入房望一望，發現佢唔見咗，一開始我都無留意，以為佢匿咗入衣櫃，後尾再仔細搵，先發現真係唔見咗佢。我好驚會走失貓，所以我一向都好小心，我都確定佢地入咗房，我先落去搬野。」
Esther在Facebook群組張貼有關尋貓訊息後，有網民指，貓咪的習慣喜歡躲在狹小的地方，所以呵力有機會躲在家俱與牆壁的夾縫裡。不過Esther已經把翻遍家裡的所有家俱，仍未找到呵力，「前日都試過走失另一隻貓，佢犀利到可以自己打開衣櫃哩入去，我搵咗一大餐。因為有呢個經驗，所以我地都打開晒、摷晒、摸晒所有櫃，所以先咁肯定佢走失咗。」他們全屋都製作了入牆櫃，所以呵力能躲進牆壁與櫃之間的夾縫機會不高。
盼愛貓躲進鄰居家
「我同老公唯一諗到，佢有可能係哩咗去隔離屋，因為當時佢（鄰居）大門打開咗，鐵閘都比較闊。」貓主人Esther指，事後亦寫了一張告示張貼於鄰居門前，可惜今早仍未收到鄰居的回覆。她認為除了走進鄰居家裡，另一個可能就是走到街上，「我哋住底層，佢可以喺走廊的欄杆跳到外面，而且大廈係Y型屋，所以比較四通八達，所以周圍都有可能。」
相關文章：沙田貓貓在家無故失蹤 主人：佢喺我人生最艱難嘅時候陪住我…
失去同胎妹妹
「佢同佢家姐一對領養番黎，依家唔見咗阿妹......」Esther指出，呵力是領養回來的貓貓，當時跟牠的姐姐一同帶回家。問及姐姐現在的情況，她回應道：「佢仍然未發現呵力走失，始終係尋晚發生，而且佢仍然未摸清新屋，所以都成日匿埋。」牠可能仍然以為妹妹在家裡，只是躲了在新屋其他地方，所以仍未察覺。
失蹤貓隻檔案
名字：呵力
性別：女
年齡：三歲
特徵：身上有黑啡斑的白色唐貓，藍眼睛，正常唐貓女的身型。
（9月12日上午10時36分更新）貓主人Esther表示，已經在屋內尋回呵力，相信牠因不熟習新環境而躲藏起來，虛驚一場。