盧凱彤生前最後電視訪問　親述愛貓如何舒緩躁鬱症

歌手盧凱彤（Ellen）於8月5日（周日）早上被發現從跑馬地一幢住宅高處墜下，倒臥平台，救護人員到場後證實她離世，令人痛心疾首。Ellen的設靈及大殮儀式在8月13、14日進行，獲近千歌迷參加告別儀式。昨晚（22/8）11時，ViuTV節目《晚吹-喵喵喵》就播出Ellen生前的最後一個電視訪問。

Ellen生前養了4隻貓，她帶同15歲的愛貓「蘇菲婆婆」一起上節目，並透露蘇菲是入行兩年後獲唱歌老師送贈。不過蘇菲天生有缺陷，其右手天生沒有指甲，所以走路時一拐一拐的。被問到為何稱呼愛貓為蘇菲，風趣的Ellen笑言：「嗰時好想睇《蘇菲的世界》，所以叫佢蘇菲，不過到而家都未睇本書。」還呼籲大家follow蘇菲的Instagram帳號：「佢自己開o架（Instagram帳號），識得用我部電話自拍，佢自己用我部電話上網。」

她續指蘇菲非常有性格，不會與家中其他3隻貓交流，獨來獨往，但同時是4隻貓裡面最有靈性的。Ellen直言患上躁鬱症，暫停工作休息期間，當自己獨留家中哭的時候，蘇菲一直陪伴在側：「冇做嘢好多時都喺屋企，當時我喺屋企喊、心情唔好嘅時候，佢係唯一一隻主動行埋嚟我度，等我喊完佢就會走，覺得佢真係冇嘥我米飯，佢會安慰我。」

另外，Ellen亦透露原本想帶4隻貓移民到台灣，下了決定後找了中介幫忙，並已辦好手續、打針、驗血等程序，但因為蘇菲打了兩次針都沒有抗體。加上因為年紀大，所以放棄了這個打算，感恩地說：「佢身體都好好，我都覺得好幸運，可以養到十五歲，好多朋友養貓養到呢個年紀，都會突然離開咗，所以我都有做定心理準備。」

最後，Ellen感性地感謝愛貓成為了生命的一部分，甚至比另一半更了解自己。至於提到太太余靜萍，Ellen指4隻愛貓喜歡太太：「佢哋鍾意我太太多我過，太太好鍾意幫啲貓配音，幫佢哋講嘢，又同佢哋講嘢，成日係咁同佢哋講嘢，仲多過同我講，佢仲叫我配，不過我真係唔識。」