裸辭，同裸跑裸泳一樣，只啱後生仔同老人家
裸辭，同裸跑裸泳一樣，一生人總要試一次（可惜我唔識游水）。可以的話就趁後生試，勇氣夠成本低唔介意人點睇（不過記住話比全世界知自己的低調）。錯過咗嘅就等老咗先做啦，老左一樣唔介意人點睇，你見坐巴士啲阿伯剪指甲啪啪聲一個人坐三個位開大volume睇片就知。
今次Blog Jamming有三個主題揀。「張德江」我就一定唔寫，原本想寫「廢青」，因為我都做過一年雙失青年，而「裸辭」我冇經驗。
後來朋友提醒，原來「裸辭」我都試過，剛好12年前，又係歐洲國家盃的暑假。果然人會選擇性遺忘。或者係我都唔記得自己曾經咁勇敢，或魯莽。如果冇嗰年的裸辭，而家我嘅人生肯定好唔同。我試過裸辭成功，亦試過裸辭失敗。 試過贊成又試過反對。即管同大家分享下感受。
裸辭好很型的畫面 只會係拍戲先有
神機測字時間。見到「裸辭」，你腦中即時浮現乜嘢畫面？
大約唔會係唔著衫咁去辭職。照計人人都理解到係「未搵到新工又唔係退休或嫁人唔使做就辭職」。
我腦中嘅畫面：有才情有理想嘅年青廚師，受唔住流水作業、廢柴同事、外行老闆、只睇錢嘅金主、扮嘢又挑剔嘅食家、有兩個錢就扮哂大爺嘅客人，甚至係業界的種種陋習等等。卒之把幾火，掉低條圍裙，拋下一句「我唔X撈啦」，行出門口，甚至仲可以拎杯水淋個客或老闆。（所以記住，扮大爺，就唔好坐近門口）
型，真係好型，睇到呢啲位，個個觀眾都想學。不過拍戲呢，之後年青廚師一定排除萬難開到自己的理想餐廳（對，錢由天度跌落嚟，或者有個好欣賞佢的富家女之類），舊老闆同事食家客人都唔小器直竪姆指讚好。大家就睇完套戲好有message，明天繼續番工。我應該睇過十套八套戲係咁上下橋段。
嚴格嚟講以上嘅畫面唔只裸辭，仲係即走。亦所以我嘅畫面係廚師之類，因為可以掉低條圍裙即時推門走人。其他人裸辭不一定會即走，你想都未必可以。坐寫字樓的，就可能仲要交番員工卡計埋條尾數，甚至由柴灣走入屯門做exit interview，然後日日返公司玩手指之類。分分鐘畀人罰你坐雜物房一個月，唔比嘢你做又唔畀你玩電話。現實可以係完全唔型。信我，我連果句「我唔X撈啦」都講過，型咗半日咁大把。
有人話裸辭等於男女朋友分手。「你會唔會一定要搵到第二個先撇而家嗰件？」
我唔同意。感情上，多數人都可以未搵到第二個就分手，工作就冇咁易。點解？首先，一個人好難同時返兩份工，甚至返住工想搵第二份都難；唔少人裸辭係因為「專心搵工」。對好多人嚟講，一腳踏兩船相對地容易，正如拍緊拖再去識第二個，點都容易過番緊工去見工。第二個原因係，返工有糧出，再難頂，你都有可能行屍走肉白逗人工一排。但對住一個自己唔鍾意既另一半，痛苦得嚟冇乜得益。
裸辭裸跑裸泳 都只啱後生仔或老人家
有人話裸辭等於裸跑裸泳。Yes and No。有乜唔同？唔同就係，裸泳裸跑有型在「裸」，平時跑步游水唔會特別型。但裸辭，型有一大部份型在「辭」。有得辭工的即係炒老細魷魚，唔理裸唔裸，都必然有型。亦因為咁，裸泳裸跑未必要有人睇住，但裸辭果句「我唔X撈啦」，一定要大大聲畀所有人聽到，老闆閂埋門，你都要講到出面聽到。裸辭冇人知，等於錦衣夜行富貴不歸故鄉。
裸辭裸跑裸泳有乜相似？相似就係，呢啲嘢都係適合少年人做，或者老年人做。 我等年紀在職場打滾咗一排的，就冇呢支歌仔。
早幾年我就裸辭失敗，是咁的：阿頭頒佈最高命令，要我report to總壇的一個南亞人。本人自覺冇一瓣不及佢，拒絕就範，就真係果句「我唔X撈啦」都一字不漏照講。不過老細好言相勸，「係唔撈，都等人炒啦，賠多啲」。 最後點？柳暗花明又一城，南亞人忽然自己唔撈，南亞語「我唔X撈啦」點講我就唔知啦。
裸辭都有世代之爭
裸辭往往係世代之爭。小朋友覺得裸辭係勇敢，本人乜都識就係爭個機會，返埋啲咁嘅mickey mouse company大才小用，唔好諗住施捨一萬幾千阻住我追夢（但其實係邊位阻住閣下追夢？最初拎支搶夾你返工定有人跪低求你勉為其難幫下手？）。
老柴呀乜乜人力顧問呢？就覺得「而家啲後生仔冇責任心，都唔知江湖險惡，古語都有云騎牛搵馬，第時就知味道。」
點解裸辭都有世代之爭？說穿了，其實就係機會成本。以本人為例，12年前嗰次仲算打工冇耐，人工唔高，年紀又輕，又未使供樓養狗之類，梗係勇敢而成功。到幾年前南亞人嗰次，就唔同講法，講完句「我唔X撈啦」係好型，但上facebook出完post，就都係check下銀行戶口先。
小朋友裸辭又不一定係「冇責任心」。老柴如我，中咗六合彩都好可能裸辭。歸根究底錢作怪。拎嗰皮幾嘢人工又上位無望，當然易裸辭；公司唔型又冇人識，當然易裸辭；老豆老母未必好有錢但都唔等開飯，就梗係易裸辭；呢啲現象全部同社會／職場流動性減低有關，好易解釋到。
最棹忌「裸辭慣犯」 除非係天才
話說回頭，乜乜人力顧問同你講唔好太衝動，裸辭過嘅，第時搵工可能多阻滯。我都請過人，可以話你知，係真的。個別大公司HR對「空窗期」好敏感，兩個月空白都要寫，而你又唔好意思寫自己睇咗一個月波，再哭咗一個月波喪，於是第一份工已經陷入打工應唔應該坦白的兩難……
我作為最終「用家」倒唔係關心「空窗期」。 問題唔係裸辭嘅人特別冇責任心，我都裸辭過我當然唔認。問題係裸辭過嘅往往代表機會成本低。可能係性格太愛自由（愛自由就唔好嚟見寫字樓工啦老細），可能係物慾比較低，可能係屋企比較富貴。呢啲同工作能力或責任心都可能冇關，但客觀地令你知道，佢重施故技的機會唔低。而十個有十個請人嘅，最怕就係請咗個人返嚟兩個月又，我想專心睇冰球世界杯而走咗。
當然，以上嘅野都係對一般人講，你係天才就冇乜所謂，你係Steve Jobs當然可以裸辭。你係 Michael Jordan去打一排棒球先番嚟拎NBA冠軍都仲得。不過Michael Jordan大約唔會返緊工在公司睇我呢篇文。
裸辭，同裸跑裸泳一樣，一生人總要試一次（可惜我唔識游水）。可以的話就趁後生試，勇氣夠成本低唔介意人點睇（不過記住話比全世界知自己的低調）。錯過咗嘅就等老咗先做啦，老咗一樣唔介意人點睇，你見坐巴士啲阿伯剪指甲啪啪聲一個人坐三個位開大volume睇片就知。
至於又唔後生又唔太老，好似我呢啲，就唔好諗了。最主要係因為，你去做，都完全唔型。分分鐘之後後悔，仲要求返人畀機會你，幾無謂呢。只有年青或年老時先nothing to lose。所以坐巴士最靜嘅都係我呢類人。
（本文純屬作者意見，不代表香港01立場。）