18歲愛犬抗癌2年逝世 港媽捐出組織供研究 「牠讓我學會珍惜」
Vivien所養的混種約瑟爹利名叫Teatea，於日前（7月26日）逝世，當時已達18歲高齡。Teatea受腺癌困擾近兩年，Vivien陪牠奮鬥至最後一刻，直到牠不肯再進食才下了個艱難的決定：為牠注射「安樂針」。
Teatea確診癌症 晴天霹靂
Teatea健康狀況一直十分理想，14歲前完全不見絲毫老態。2016年，Teatea當時已16歲，其身體開始出現問題。醫生指牠的肝指數及腎指數都偏高，需要定期覆診及服食營養補充品。同年8月某天，Teatea情況突然轉差，毫無食慾；Vivien見狀馬上帶牠找獸醫。經過血液化驗後，獸醫推測Teatea九成是患上了淋巴癌，確實結果需抽取組織核實。Vivien接受《香港01》訪問時，表示她當時拒絕抽取組織：「佢（Teatea）16歲啦，我驚佢未必受得住麻醉。」
遍尋藥方望有起色
起初，Vivien因顧忌類固醇的嚴重副作用而不欲Teatea用其壓抑病情，於是她四出尋找有用藥方並服食醫生處方的保健品。她首先光顧了一家網上頗有名氣的中藥店鋪，每個月花費逾3000元買藥。期間，Vivien同時也購入了許多不同補品，如褐藻糖膠、姬松茸、白藜蘆醇，只望愛犬病情有所改善，但一直都無補於事。隨後，Vivien終同意讓Teatea服食類固醇，服食後情況依然時好時壞。
2017年5月，Teatea情況急轉直下，沒法自行站立及如廁、喘氣、身體顫抖和無精打采。在親友推薦下，跌落谷底的Vivien得知一種抗癌配方保健品的功效顯著，因此決定讓Teatea一試。Teatea服食該保健品後，情況雖仍不太穩定，但整體情況有少許改善。Vivien非常開心見到愛犬病情稍有起色：「只要佢覺得舒服啲，咩都值番。」
全天候貼身照顧 晚上無法熟睡
2至3個月後，Teatea已經不能再自行走動，也無力自行排便；Vivien甚至會親手幫牠排便。誠如每個需要照顧年老寵物的主人一樣，Vivien每天晚上為了照顧愛犬，頂多只能睡3至4小時。Vivien直言：「我搬咗去廳瞓，因為佢（Teatea）每隔1至2個鐘就會叫，想我餵佢食嘢或者去廁所。」於是Vivien一個晚上需要起來數次，她指：「以前我好懶瞓，為咗佢，而家變得好醒瞓。」
慳家Vivien花費十萬：只要我仲負擔到都會買
Vivien承認自己以前是個「慳家」的人：「以前我唔會捨得買啲有機（狗）食物，買糧都會比較下邊隻平啲。但自從佢出事之後，價錢已經唔再係我考慮（因素）。雖然我唔係好有錢，但只要我仲負擔到，我都會買，最多咪自己慳啲。」她坦言，由Teatea確診至今，種種花費已高達8至10萬元。但她卻認為自己的付出只是冰山一角：「我覺得我已經唔算付出得多，我身邊有朋友所養嘅狗狗做一次手術已經係呢個價。」
Teatea安樂死 成「啞老師」遺愛人間
Teatea一直努力對抗病魔，直到上月26日。7月24日起，Teatea已經完全不肯進食及自行站立，神情疲倦。Vivien不忍愛犬受苦，同時憶起獸醫提及希望抽取Teatea組織化驗以助日後治療和處方，她決定為Teatea進行安樂死，讓牠成為「啞老師」遺愛人間。她續指：「如果唔係醫生話（Teatea細胞組織）有價值，我都唔會忍心要佢受呢針（安樂死針）。」
照顧愛犬時間表緊湊 其去世後頓失所依
Teatea去世後，Vivien的生活起了很大改變。她指：「每日起身都好唔慣，因為以前每日個Schedule都係關於佢（Teatea）。我以前每朝10點要起身餵抗癌保健品，1點就要餵胃藥、正餐同類固醇；佢嘅嘢食係我親自煮。3、4點就要帶佢曬下太陽，餵下水；因為佢已經冇辦法自己行去飲。到6點半，要餵佢食醫生處方嘅保健品。7點半又夠鐘餵狗餅同supplement（營養補充品），9點幾可能要再餵下零食。等到11點幾再餵佢食其他營養補充品。」
相關文章：為照顧17歲老狗她日睡3小時 「只要佢一日肯食嘢我都會陪住佢」
Vivien：知佢有病個下，唔想接受現實
Vivien現時情緒已平伏不少，但當初她也有過瀕臨崩潰的時刻。她指：「最辛苦一定係知佢（Teatea）有病個下，完全唔想接受現實。同埋佢走（去世）個下，嗰種感覺震撼到唔識形容，痛到夭心夭肺。每個主人都盼望寵物可以安祥咁過生，所以要帶佢去打針（安樂死）呢個決定好難做。不過可能係因為已經有2年時間做心理準備，當下反而冇崩潰。」
Vivien：過分執著生死只會浪費狗狗生前帶俾你嘅歡樂
作為過來人，Vivien想勉勵各位面對著類似情況的寵主不要太過執著於生死。她指Teatea病危這2年來令她獲益良多：「其實呢2年令我學識咗好多，更加識珍惜、唔執著；呢個經歷豐富咗我嘅生命。希望其他主人都唔係過分執著於生死，如果你永遠都唔釋懷，就浪費咗狗狗生前帶俾你嘅十幾年歡樂。」