【專訪】趙勁皓開7間鋪靠40萬起家：有得有失，後悔無得見識更多

或者係因為曾在寫真集中做過擘脾跳鋼管舞等動作，令大眾對趙勁皓（King）的印象麻麻，但諗深一層，他又不是去偷去搶，都係為兩餐啫。
為了不想屋企人負擔太重，趙勁皓16歲已開始半工讀，回望過去「每日計住自己用幾多賺幾多錢。」的日子，或許是比同輩享受/見識得少，但換來的是30歲已有兩層樓、七間鋪（健身房、火鍋店、酒吧）、再加老婆同個女，都算係咁啦。

趙勁皓於大台剛播畢的《飛虎之潛行極戰》也有參演一角，戲份不算多，但他說保持幕前曝光有助他傾生意。「亦都算係心靈上的綠洲，你明唔明成日都喺酒吧、對住啲錢都要搵返少少平衡，雖然我演技唔係勁，但當你對住一班對做戲充滿熱誠的人，嗰種感覺我好鍾意。」這綠洲對趙勁皓來說，其實得來不易。

16歲開始打工，做過酒吧、籃球教練、中文老師、模特兒……同輩畢業去旅行、working visa通通無佢份，當然就話為賺錢，但如今賺到了，他說去旅行的次數一隻手數得晒。「等價交換，有得有失。我其實有少少後悔，無機會去見識更多，但其實我細細個就已經計劃好要35歲時舒服啲，起碼有一層樓住一層樓收租，因為見屋企人工作辛苦，甚至乎以前打波，見到其他人裝備好好，都會自先去比較，同埋會諗如果我係走條正常嘅路，我下一代都係咁，所以好想去改變。」家境唔富裕，再加上有個修讀護士的姐姐，面對種種的經濟壓力，令趙勁皓自小已經有「每日都會計住賺幾多、用幾多」的概念，而這一套如今亦應用在其生意之上。

趙勁皓說自己最瘋狂的打工日子大概就是，早上八點返學教書、收工教藍球然後再自己練波，練完返酒吧開工，就算到零晨都無得休息，因為要備課，連續過了這個非人生活四個多月，終於頂唔順。「剛好有人搵我做model，但屋企人其實有微言，一來他們認為娛樂圈隨時乜都無，二來是希望我可以穩穩定定咁打份工，然後娶老婆買樓，所以那時都好努力工作希望令佢哋覺得我無揀錯。」趙勁皓入行至今，其實也就出過兩本寫真、拍過一部電影《爆3俏嬌娃》同埋剛播完的劇集《飛虎之潛行極戰》，幕前工作只為維持知名度。「我覺得呢樣嘢幫到我做生意之餘，就連去健美比賽，大家身型已經係極至，但如果人哋認得你係會有少少優勢。」
 

趙勁皓在酒吧打工時，認識了現在的兩位拍檔，聽到要在銅鑼灣要開餐館，他計過度過，問銀行借了19萬，再加上多年的積蓄，以40萬做股東，在無蝕無比人呃的情況下，一路以錢搵錢的方式，由一間鋪變為七間鋪（年尾預計有九間），看似風光，不過，他略帶謙虛的說自己還未搵到第一桶金。「因為本金細，所以賺回來的錢就放到第二間，如果唔夠都要問銀行借，唔想為咗做生意而要按層樓或者影響屋企人的老本，我寧可佔少一點的股份。」雖然未搵到第一桶金，但家人生活改變了卻是鐵般事實。「係改善了生活， 但我覺得距離成功仲有好大段， 27歲置業、28歲再買多個單位 ，係有交代 ，但係未好叻？咪又係供。」至少供得起！

場地提供：雲長小龍坎老火鍋