【末世街10號】誰騙誰騙誰？人就是犯賤
事隔八年，又來一套《末世街 10 號》（10 Cloverfield Lane）。又搵多一次笨？係呀，因為在當年不甘被騙的九成人當中，又會有九成，死死氣再自投羅網一次，為滿足好奇心。人類就是犯賤。嚴格來說，今次，不可以叫被騙…當開場後經過一段時間，仍然未出現睇到觀眾頭暈的手搖鏡頭，你才有資格說被騙。
2008 年，有套電影，叫《未世凶煞》（Cloverfield）。未上畫，做宣傳時，電影公司開了幾個網站，將預告片的攻擊紐約事件，包裝到真有其事一樣。電影海報是一個頭部被毁滅的自由女神神像。監製是當時已執導過《職業特工隊 3》（Mission: Impossible III）的 J.J. Abrams。劇情極神秘，連片名點解都無人明。人人以為是超級科幻特技片。點知，是部低成本偽紀綠片。
不同性格的，會有不同感受。有人會欣賞當中的心思，覺得充滿驚喜。有人會破口大罵，覺得被搵笨。九成的人都是後者。事隔 8 年，又來一套《末世街 10 號》（10 Cloverfield Lane）。又搵多一次笨？係呀，因為在當年不甘被騙的九成人當中，又會有九成，死死氣再自投羅網一次，為滿足好奇心。人類就是犯賤。嚴格來說，今次，不可以叫被騙，因為入場前大概已估計到是什麼一回事，不會寄望是另一齣《變形金剛》或者《天煞地球反擊戰》。當開場後經過一段時間，仍然未出現睇到觀眾頭暈的手搖鏡頭，你才有資格說被騙。
一覺醒來世界大變 局中有局真假難分
劇情以一個美女作視點，跟男友鬧分手，炒車，一覺醒來，發現被困密室。未健身的大肥佬出現，恐嚇：「小姐，我唔係變態，只係外面世界的被攻陷，空氣有毒，鎖住你，係為了救你。」故事又不是在北京發生，美女都未見過紫色天，點信呀？點知，一個同樣住在密室的靚仔話：「無呃你喎，我親眼見到。」出自靚仔把口，可信性唔知點解會立即提升。然後，一個滿面爆瘡的師奶拍門，一臉驚惶地嗌救命。美女終於信到十足。正打算跟肥佬跟靚仔安安份份足不出戶，等到無事，又發現肥佬好多秘密，好有問題。好了，又一百八十度轉身，到底眼前所見的真實，係咪完完全全只係一個局呢？除了美女外，個個角色夾埋做戲整場大龍鳳來欺騙世界呢？
故佈疑陣，難分真假，根本就是 J.J. Abrams 成名電視劇《迷》（Lost）的成功之道。當年，《迷》的爛尾，令我氣憤到失眠，所有重大謎團都無為觀眾提供一個較合理的交代，完全是 J.J. Abrams 走紅後，忙於搞巨型電影計劃的後遺症。今次似有心撥亂反正，去到結局，頗清楚地說明前因後果，我偏偏又覺得多餘。電影重點是你相信不相信，戴住防護罩，夠不夠膽打開一下，看清楚真實世界究竟是黑暗還是安全。將結局停留在望見飛鳥飛過的一刻，猶豫於前進與保守中間，讓觀眾自行代入下個決定，可能已經足夠有餘。未必需要講清楚真係發生了什麼事。現在，卻畫公仔畫到出腸，變成教育電視，反而令人納悶。
看到這裏，我想你應該會記得，我一早話過，人類就是犯賤。
（本文純屬作者意見，不代表香港01立場。）