【VR驅魔人】吳浩康首演同性戀者 與小情人林耀聲人鬼情未了
撰文：陳栢宇
出版：更新：
ViuTV劇集《VR驅魔人》分開咗十個單元故事，而且每一個故事背後都係代表住一個社會議題，唔係純粹一套搞笑嘅鬼鬼怪怪劇集咁簡單，今個星期其中一個單元就會同觀眾講一講同性戀呢個話題。劇中，吳浩康（Deep）飾演嘅孝哥係一個心狠手辣嘅黑社會大佬，出名哂名有仇必報，但其實仍背後仲有個不可告人嘅秘密，雖然已經有一個靚靚老婆陳逸寧，但一直以來佢心入面最記掛，都係中學時期嘅小情人林耀聲，而首次飾演同性戀者嘅吳浩康喺戲中更有同「Gay界男神」林耀聲輕吻場面，都幾突破下。
至於點解肯做一個咁嘅角色？Deep就話自己同劇集導演兼編劇兼演員嘅劉翁（Sunny）識咗十幾年，對方邀請就第一時間應承：「同Sunny識咗十幾年，佢又係著名攝影師，同佢合作肯定拍得靚，我係以劇本行先，加上班底又強，所以非常期待劇集出街。」劇情講到Deep要醉住一面唱《愛後餘生》，另一面思憶同性密友，吳浩康就話自己鍾意音樂，所以可參與有關歌曲的幕後工作：「我可能做下電影配樂啦，而且我都鍾意做演員，所以做埋其他崗位就未必會喇！早排先做完演唱會同幾套劇，但呢行要感恩有工開，有嘢做嘅感覺係最好！」
從圖片觀看這個令人感動落淚的故事:
+8