【VR驅魔人】史上最多串星嘅劇？　二十集玩轉香港各大爭議話題

ViuTV新劇《VR驅魔人》將於明天（3月26日）晚上10點鐘首播，除了有王貽興、劉翁（Sunny）自編自導自演，更有大量歌影視紅星演出，包括葛民輝、詹瑞文、劉浩龍、吳浩康、江若琳等，完全係多不勝數，而作為港產鬼片、殭屍片代表人物的錢小豪、吳耀漢和樓南光等亦有份亮相，陣容強大到就算不是鬼片Fans都好期待。

劇集一共20集，分開十個單元故事，會以輕鬆戲謔的手法去探討好認真嘅香港社會問題，包括學童自殺、獨居老人、對同性戀的偏見等問題。咦？乜唔係講用VR捉鬼咩？貽興接受《香港01》訪問時就答謂：「其實我同Sunny喺劇都係做返自己，一個係喺大台撈唔掂、專欄淨返冇幾個嘅作家，一個就係因為冇人出碟搞到冇得影唱片封面嘅攝影師。」

貽興繼續解釋時就指他與劉翁在戲中與現實一樣，拎住十個故事周圍Sell，但大多數的老闆反應都一樣，均指鬼故因為內地唔播得所以冇得使。Sunny補充：「但其中一個老闆就話VR見鬼有得做，所以我哋就把心一關發大嚟做嚟呃人錢，到之後有錢拍咩都得，但點知從中幫咗好多人。」

飾演Sunny舅父的葛民輝便是首隻白老鼠，Sunny謂：「佢每晚8點03分都會由廚房撲去廳，廳撲去廚房，再由廚房撲去神位，跟住神位再撲出窗咁，原來佢係因為親眼望住佢老婆跳樓先搞成咁，而佢當初係唔知老婆係有抑鬱症，當晚佢想捉住佢老婆但始終爭兩吋，最後就搞到每一晚都重覆呢個動作。」而這個VR程式就令阿葛睇到想睇嘅嘢。

除了吳耀漢擔綱的「獨居老人」故事和吳浩康做主角嘅「同性戀黑社會大佬」故事，陳國邦、羅敏莊夫婦的「自殺學童」故事亦相當爆。飾演兩人兒子的劉小華不堪學業壓力跳樓自殺，自此之後，兩公婆便愈走愈遠，羅敏莊反思以前如何做錯，但陳國邦則堅持己見覺得一切都係為仔仔好。雖然陳國邦做喃嘸佬，但一直不相信世間有鬼，卻同時好想質問已死仔仔，所以想透過VR尋找一個答案，「到底係邊個逼死你」。