《太陽的後裔》大結局　男人黑暗歲月終於重光

日日睇都係《太陽的後裔》，煩唔煩呀？（另一編輯嬲嬲豬按：剩係睇到呢句都知寫呢張貓紙嘅，係男人定女人。）最慘係一眾好男人。日頭返工做奴隸，以為放工可以同伴侶分享一絲溫柔，點知老婆女友夜晚時段雖身在香港，心已跟咗仲基去韓國當兵，兼投入幻想下自己係慧喬。網上流傳「丈夫守則」，叫你唔好阻住老婆追劇，隔天都不要煩老婆，就算重播時段都要 keep 住低調啲，總之不要低估「宋仲基效應」云云。可想而知，為人丈夫，有時真係有苦自己知。

為咗打救一眾麻甩佬，點都要了解下發生咩事。《太陽的後裔》離不開韓劇情情塔塔、生離死別嘅大旋律。故事講述特戰部隊組長劉時鎮（宋仲基飾）和醫生姜暮煙（宋慧喬飾）在韓國和派兵地區之間往返相愛的故事。一次意外，多多誤會，成就二人一見鍾情。但係師奶劇又點會咁簡單？劉時鎮拍檔徐大英（晉久飾）同埋軍醫尹明珠（金智媛飾）戀人參戰。原來尹明珠讀書時畀姜暮煙撬過牆腳，深深不忿。然後大家又發現軍人同埋醫生的信念南轅北轍，於是，理性與感情交戰，離離合合，飛來飛去，死過翻生……最後（比 TVB 高質的）天台 BBQ 大團圓。

好啦，家陣韓國嗰邊 終-於-大-結-局，計埋特攝，最多 19 集，黑暗盡頭終於出現曙光！

其實，劇情唔重要，你留意一下，老婆女友感動位，多數係宋仲基徐大英關懷女友嘅小甜蜜。所以，返到屋企，花多少少時間關心伴侶，得閒幫佢綁下鞋帶、紮下辮，再深情一句：「我希望你不要受傷」或者「你過得好嗎？」相信好快就唔會得太陽先有後裔架啦！

 延伸行動 

陪老婆女友睇埋《太陽的後裔》大結局，保持恆久忍耐，偶爾背返一兩句經典對白，保證冧冧豬。

咩話？直情一集冇睇過？是時候補習了，睇下面，唔該：