《矛盾》與《殭》 ViuTV 與TVB 鬥成點？
電視大戰，兩軍對壘，客觀推算兩間電視台一定出盡全力......依家情況睇，大台同新台都未達到我想要嘅標準，想開闊觀眾眼界未必成事，到底係咪我要求太高呢？
電視大戰，兩軍對壘，客觀推算兩間電視台一定出盡全力。身為電視迷就一定要睇住啦，因為佢哋嘅招數係代表咗大台同新台嘅最大能力值，直接影響到觀眾嘅福祉。（唔好意思容許我將有線同港台電視放埋一邊先。）
大戰必有死傷。除咗楊怡、郭晉安畀宋慧喬、宋仲基打到成為今次大戰嘅首名炮灰之外，仲有女神謝安琪都負評如潮。開足turbo宣傳嘅《殭》播咗幾集，頭半集用謝安琪做膽，網絡上對佢扮天真嘅演技媽聲四起。不過最失望嘅都唔係啲演員嘅演技（因為心裏有數），而係大台一再hard sell嘅特技。
有人搵亞視永恆劇《我和殭屍有個約會》去做比較，我覺得唔公平，話晒最後一部《殭屍》都已經係2004年嘅事。要比應該同《張保仔》比，兩齣劇年份近，同樣外判畀同一間特技製作公司去做，但可惜《殭》仲衰過《張保仔》。鄭嘉穎、陳山聰撞落啲樓度爆開咗，啲塵一秒就飛完，成個真空狀態去打咁款。謝安琪死起回生一分鐘特異功能就乜特技都唔做。咁何必叫人去睇特技呢？
劇情唔識講呀，都係東抄啲西抄啲，唯有講吓將唔同劇情拼埋一齊點處理啦。謝安琪天真演繹唔覺意變咗搞笑，又南、邦民女嗰邊都係搞笑，就連坤哥出場都係搞笑（仲要係剝衫低級趣味），到底呢齣係奇幻劇定係笑唔出嘅笑片嚟我搞唔清。
《跟住矛盾去旅行》第一pair，曾主席同長毛可以話係萬眾期待，但出到嚟個剪接好多時都鬆散，對剪嗰啲位只係喺最後一集接受波蘭人訪問同埋酒吧傾偈嗰部分好啲，其他都對唔到嘴，對唔啱feel。講到矛盾，喺個旅程裏面見到嘅，都係喺立法會裏面已經出現晒嘅矛盾，其他就全部都得把口講，無乜事件發生，只係贏在搵到呢兩個人。失望。
仲有，個名有「旅行」兩個字，剪啲碎shot交代下個地方都要啩。安排兩個去探訪波蘭家庭又去社區中心，但係乜都無講，就連同啲人傾吓偈都無就行返出嚟，咁喺香港拍都得啦。最初話係窮遊，但最後又無交代佢哋有幾咁窮。總之就無乜重點、甩甩漏漏，好唔過癮。不過佢有個先天位好過《殭》，就係三集之後又重新洗牌嚟過，我就等睇補習天后同自然校長。《殭》嘅網上反應仲未計埋近排風評麻麻嘅陳凱琳，真係好牙煙。
正所謂「愈唔期待愈有意外」，《瑪嘉烈與大衛 綠豆》係幾好睇。個人偏好愛情小品，之前無綫嘅《愛我請留言》、《陪着你走》等嘅小品嘢亦都證明受年輕人歡迎。ViuTV今次拍法唔跟無綫，似電影短片，又有游學修同林耀聲呢啲青春又有演技嘅演員加持，減低咗林保怡陣佬味同大台味。不過我就見到有觀眾喺官方facebook留言，話齣劇太暗又多雜聲（專登推大啲車聲、腳步聲居然話係雜聲…）。只可以講大台有一套拍劇嘅方法，香港觀眾睇咗咁多年接受咗，就認為佢嘅拍法先叫電視劇。
Come on～要睇新台就要有新態度，如果佢照搬無綫嗰套過嚟做，或者觀眾照搬睇無綫嘅習慣嚟睇新台嘅話，就不如睇返無綫啦。不過照依家情況睇，大台同新台都未達到我想要嘅標準，想開闊觀眾眼界未必成事，到底係咪我要求太高呢？
（本文純屬作者意見，不代表香港01立場。）