從洛輝之死到毛記分獎禮

大家見到雨傘運動後被迫成為獨立歌手嘅何韻詩，見到近日辭去商台一姐職位嘅俞琤，無論你喺現場睇，喺天橋底睇，你都會有種「心照」嘅感覺。到最後河國榮同MC仁合唱一首歌詞更貼近時事嘅《香港地》…

筆者仲記得，細個（1976年）嗰陣，幾乎全港市民閒日夜晚都返屋企追無綫電視嘅連續劇《家變》。白文彪飾演嘅洛輝去世嗰一幕播出時，街頭巷尾都傳出哭聲。跟住，香港咩嘢類型嘅娛樂都有，咁嘅盛況難再重現。估唔到，近月呢種賓墟場面竟能喺互聯網世代重演，一次係舊年11月嘅中港大戰，最近呢次自然係毛記電視分獎禮。

有「專家學者」話喎，依家啲人娛樂選擇多，所以越來越個人化，大家集體追捧某一節目嘅可能減低。不過啲「專家學者」講嘅嘢，通常都只係啱一半。

其實喺香港社會，大家雖然各有各忙，但去到一啲位，主流港人都會有主流睇法，亦有一啲主流價值，主流觀點，但呢啲嘢呢幾年真係畀一啲大家都知嘅勢力「和諧」晒囉。只要有人能夠捉到港人諗法，要搞到好轟動，街頭巷尾都講你個節目，原來又唔係咁難喎！

忍夠主流與大台　需真港人共鳴

近年港人經歷多番波折，雙非迫爆、奶粉缺貨、樓價狂飆、普選流產、鄰近大國財大氣粗，但由於你我都知嘅原因，「大台」同「永恆台」都唔會講呢啲嘢。香港人近三十年真係忍夠「大台」同「永恆台」。「大台」一味結局拉布同BBQ，「永恆台」一味重溫經典（雖然唔少都真係好睇過大台近年製作），所以一旦有嘢能引起真港人嘅共鳴，迴響會咁大！

創意嘅嘢，筆者真係識條毛，但唔知大家同唔同意，毛記電視分獎禮同當年嘅《歡樂今宵》都幾似，所以一睇到毛記電視分獎禮，筆者都真係好受。雖然毛記電視猛畀人話一味「二次創作」，兼且唔夠政治正確，經常挖苦女性或弱勢社群，亦有人話毛記電視「勾結奸商」，好接受破壞北極生態嘅某石油商贊助，但起碼佢哋夠薑講真話，冇大台咁多政治禁區；起碼佢哋提供咗「苦中作樂」嘅空間。今時今日嘅香港地，「苦中作樂」都慢慢成為一種奢侈喇！

（本文純屬作者意見，不代表香港01立場。）