【博評】縱使陶傑錯漏百出，讀者根本唔介意
唔關事小故事一個：知唔知巨蟹座點嚟？話說天神宙斯（Zeus）嘅私生子，大力士海克力斯（Heracles）同長蛇座九頭蛇開拖。宙斯老婆希拉（Hera）搞搞震，搵隻巨蟹咬海克力斯，結果畀海生一嘢踩扁咗。希拉可憐隻蟹見面四秒香咗，就將佢放上天，成為巨蟹座。
本人正係巨蟹座。近期見生果報馮睎乾狂插「十九才子」陶傑，就諗起呢個故事。原本唔到我呢啲二打六出聲，但網絡民主化，正所謂「即使我們錯，不比他們多」，更多唔關事嘅人都出咗聲，本蟹唔爭在飛身出嚟畀人踩扁——話唔定有得飛上天。
循例申報。我同馮生全不相識，亦不見得係佢粉絲，不過佢近年聲名不錯，唔少朋友鍾意佢，我間中睇佢嘅文，都覺得幾好。
至於陶傑，值得寫多幾句。首先，曾幾何時佢係我偶像，我拎書畀佢簽名，佢對我寫作影響甚深。另外，佢亦都在港大教過通識課，係我唯一上齊嘅課——即使完全唔影響成績。最後，陶傑係我大學校友，星期六晚先在Warwick嘅聚餐搵佢合照，當然我識佢佢唔識我。
你見我寫得「曾幾何時佢係我偶像」，其實暗示咗，近年已經唔係咁鍾意佢寫嘅文，我亦唔同意佢對呂麗瑤事件嘅評論。馮生近期對佢嘅批評，亦由呢件事開始，好多批評我都同意。
但網上討論，例必失焦。講講下，就去到陶傑本人嘅人格同學識。人格方面，N咁多年前陶傑已經畀人話有才無德，冇風骨，係「文妓」，佢亦反駁過，大家心中有數，本文不再討論。撇開人格，馮生最新文章批評陶傑冇乜常識，我覺得就相當堪玩味。
批評陶傑成日搞錯基本事實，馮生唔係第一個。吾友話睇陶傑只能學修辭，不能睇立場同事實。十幾廿年前我年少氣盛，一樣試過電郵陶傑，指出佢專欄寫錯歷史，諗落都無聊。
港大年代，我親眼見過陶傑在眾多學生面前出錯。當年佢教「英式禮儀」之類，播台灣歌手辛曉琪的《味道》，有句「想念你白色襪子 和你身上的味道」。陶傑就話，台灣佬都係老鬼土，冇品味，男人老狗著乜鬼白褲？講咗一大輪偉論，卒之有勇敢嘅同學舉手話佢知，「襪子」呀陶生。陶傑面都唔紅，好快就一句「咁仲衰！男人老狗著乜鬼白襪？」，仲即時捲起自己褲管，以示清白。大家都笑了，佢又過骨。此故事重點唔係陶傑嘅普通話聆聽水平，而係佢嘅急才同滑頭。畀你捉到錯又如何？
陶傑行文粗疏，人所共知，潘國森甚至出咗本《修理陶傑》，我都買咗，可惜封面唔係搵槌仔螺絲批「修理佢」。但，又如何？而家邊個識潘國森？大家只會聞到一陣文人酸臭味。
馮生提到「缺乏常識的意見領袖，好比沒穿鞋的刀客，我沒信心」，但，真的嗎？首先，呢種講法，本身已經幾粗疏。如同話「辦公室張枱都未執得整齊，點做大事」「自己體重都未管理好，點管理人地財產」之類，其實冇乜必然性。
陶傑年紀唔輕，又貴人事忙，正如佢自己講，只會憑記憶寫文，相信佢連交文前自己睇一次都唔會，經常出錯不足為奇。況且，陶傑早已上神枱，寫文錯漏百出又如何？大把讀者會為佢護航。絶對唔使好似我哋呢個年代嘅卑賤作者咁，寫文例必fact check，費事寫錯畀讀者問侯全家。
最重要係，就算陶傑知識粗疏，又如何？正如有人（包括馮生）話佢抽著火水，我就覺得實在係太天真。
一個問題：讀者要乜先？陶傑話資料可以 Google，雖然無賴，但確係事實。馮生講一大輪文學，當然有知音。潘國森本書就夠引經據典逐篇駁，但，邊個理佢？讀者要嘅係乜？係要人肉百科全書老學究？陶傑一句「我明嘅，你都要搵食」，在讀者心中已經 KO 潘國森。
陶傑受歡迎，從來唔係因為佢資料好準，而係佢文筆辛辣，講嘢抵死，抽水到位，敢打破禁忌（玩到要同菲律賓道歉添）。加上佢對民情掌握得好，識得見風駛艃，遇錯時就滑不溜手。呢個先係佢長期如魚得水嘅原因。
有一年大學晚宴，應係沙士後不久，社會氣氛好差。陶傑上台，叫校友唔好灰心。香港現況係差，但再衰，都未衰到香港人去菲律賓做工人吖。未算，加多句「就算有，都唔係我哋 Warwick 嘅學生啦。」全場掌聲雷動。陶傑巧言令色襟撈非常，又一例子。
性侵事件，佢得罪好多人？只要佢聽日出返篇文鬧大陸人鬧土共鬧左膠，讀者照樣爭住share，根本唔會介意佢之前資料有幾多錯。話佢常識出錯，完全係捉錯焦點。
同樣地，有人覺得佢今次「抽水抽著火水」，我絶對唔同意。同種種咩「公關災難」一樣，只係個別網民自 high。 Lancome 執左笠未？冇噃。你話陶傑過火？我冇統計，但唔見得佢 Facebook Page 少咗人睇，亦唔覺得佢影響力細咗。
話陶傑係 KOL，太睇少佢。佢 N 年前已經被譽為才子，但去到網絡年代佢一樣影響力深遠，冇畀科技淘汰。歸根究底，大家上網唔係求真相，而係求消消氣。我要知識我睇書或者睇維基百科啦！
呢個亦係美國總統投票，或英國脫歐時，傳統傳媒嘅盲點。係咁搞埋啲咩 fact check 自 high。好啦捉到你喎侵侵講大話 Nigel Farage 呃人。又如何？選民真係在乎呢啲嘢？誤判晒。
舊年牛津字典嘅 Word of the Year，正係「Post Truth」。後真相年代，陶傑更加受歡迎，寫錯幾多嘢，根本唔重要。因為讀者都唔係想求知求真相。係可悲的，但世界就係咁。
馮生質疑：常識欠奉但觀點居然可靠？我話：觀點根本冇可唔可靠，只有大家 buy 唔 buy。大家當然都信冇鞋嘅刀客，正如最紅嘅歌手都唔係唱得最好嗰個。
（本文純屬作者意見，不代表香港01立場。）