【專訪】陳家樂31歲想結婚：可能會同公司立場唔同

自覺是演員，需要有自己的生活，也不用刻意去討好觀眾，陳家樂的想法連他本人也認為是迂腐，而他其實只不過31歲。
唔再死背對白、唔再有事粒聲唔出走人，原來只要肯多行幾步，世界即時唔同晒，甚至連收入都多埋，人生仿如打開了新一頁。去年一口氣拍了3部鬼片，目前人在北京演奸角，這種忙到無時停的感覺，陳家樂絕對享受，至少不用再被妹妹笑「無野撈」。

「入行12年，都係得3年搵到錢，呢幾年先照顧到屋企，攤均可能得幾千月薪。」藝人表面風光，內裏有幾坎坷，陳家樂完全話到俾大家知，既然一年開得兩三日工，為什仍然留在這圈呢？「因為真係好鍾意。」最正的是，家人從不過問，老竇甚至會塞錢俾佢使，任性大概就是這樣培養出來。「爸爸小時都想做演員，所以佢好縱容，真係一句都無叫過我唔好做，但如果零收入係發生係呢幾年，爸爸開始退休，就可能唔同講法。不過，我妹妹係有說話嘅，例如『喂你都無嘢撈，重唔出去返工？』」陳家樂說這是他與妹妹的相處模式。

去年《幸運是我》與惠英紅合作，記得當時訪問二人時，紅姐多次提到家樂進步不少，打從心底感受到前輩的關懷，舊事重提，當事人也笑着表示與紅姐是一種緣份。「之前有一套作品係做佢個仔，當時係需要用對白交代劇情，所以我成日都好怕講錯對白，最後就變咗背對白，紅姐當時直情話我唔得，呢句說話一直記喺心，之後不斷提醒自己，到《幸運是我》可能佢見到我真係有進步，所以對我好少少咁。」擺喺心的，又何只紅組一番話，陳家樂接着又爆出casting蠢事，令他一直介懷至今。「之前cast一套大片，我做古惑仔，一到場我就代入角色，用輕挑口吻同其他人講嘢，但到真係講對白時又甩甩卡卡。」角色沒得到，劣評在數月後收到。「有導演叫同事教下我，話我態度好差，casting掛住玩。」陳家樂說時表現無奈，但身旁同事卻笑到癲。「咁我真係緊張嘛，到而家都好介懷。」

事業去年開始有轉機，女友余香凝也因《骨妹》而突然加速，步伐會否不太一致？沒想到陳家樂的回答是：「你覺得我哋步伐唔一致咩?」他說對方無論走到什麼位置，都一樣會為替她高興。「呢行係咁，無話齊上齊落，佢都想我好，咁唔通佢有機會去外國發展，我叫佢唔好去咩。我同佢真係好鍾意做戲，有時搭搭下火車，會扮唔識或者好耐無見，又或者我收到劇本，會一齊睇，佢會俾到一啲女性角度的意見我，很多東西可以交流。」拍拖兩年多，感情穩定，陳家樂甚至已有成家立室的打算，一來是因為身邊朋友都已擁有自己的家庭，二來他認為藝人也可以有常人的生活，但他認為經濟狀態暫時未容許。「我係演員，需要嘅係生活，可能會同公司立場唔同，但我需要感受世界，出街唔需要裝扮。」余香凝今年才24歲，事業剛起步，會否話嫁就嫁？請大家等一等，看一看。