【來稿】當沈祖堯都話自己寂寞，咁你係咩？

文：Cliffless

寂寞同生活係分唔開嘅，尤其當你係一個事業未成嘅男人，Whatsapp搵你嘅就只會係group chat、Facebook friend request亦只會係Double May。當你仲考慮緊撳唔撳accept時，碌到中大Facebook條片，堂堂校長沈祖堯都話自己寂寞，真係要問：咁我算係咩？但其實佢無講錯。講到寂寞，沈祖堯同你一樣，都係平等嘅。爭在佢覺得寂寞係成班人玩電話唔理大家；而我覺得，生活喺虛偽嘅人堆中，先係真正嘅寂寞。

可能因為我中學讀男校，成班男人慣咗快人快語，唔啱講到啱。我實在好唔明白，點解你覺得一個人有問題，唔可以兜口兜面講清楚？佢唔係你個客，又唔係你老細。道不同，可以不相為謀架嘛。就算你唔好意思直接講，你咪積下口德，收埋喺心入面咪算囉，點解要喺人背後周圍唱人？成台人坐低，你見住對面嘅Janet同Tiffany傾到不知幾開心，但其實尋日Janet啱啱先同你講，Tiffany真係又姣又煩。呢句「又姣又煩」，同你眼前姊妹情深嘅畫面重疊，我不禁問自己：條八婆點解假成咁？

我曾經有段時間，好抗拒呢種虛偽。試過一次去大尾督燒野食，班友一傾就係兩個鐘，我就足足喺海邊吹咗兩個鐘頭風。但後來為咗要「融入社群」，我唯有坐低扮聽埋一份。每班朋友都一定有個特別八，把嘴特別賤嘅人。見住佢平日同人扮晒friend，人地一唔喺度就是非當人情，而成班朋友聽到欲罷不能。

喺嗰刻，你會覺得無人明你；無論身邊有幾多人都好，你都會感覺到寂寞，因為你並唔屬於呢班人。其實我明嘅，呢種虛偽都係源於利益、源於自私。其實虛偽者，又點會睇唔穿人地嘅虛偽？只係大家選擇唔去揭穿大家。當一日條利益鏈一斷，就好似次按風暴咁，一次過散band。

其實我相信好多人變得anti-social都係因為呢個原因。我為咗要有朋友，逼自己去忍受呢班人嘅虛偽，然後發現自己接受唔到，最後決定抽身。所以沈祖堯話見到個個玩電話唔理人搞到佢好寂寞；我就話其實係人因為寂寞，先掛住玩電話唔理人，因為至少機器唔會呃佢地。

淨係得Double May Add你，其實一啲都唔寂寞，至少你可以肯定佢地一定係假嘅；但人同人之間嗰種虛偽，你永遠分唔清真定假。嗰種感覺會令你覺得你唔屬於呢群人，亦無可能成為佢地嘅一分子。而當你發覺世上絕大部分嘅人都係呢類人嘅時候──呢種先係真正嘅寂寞。

（本文為投稿，稿件可電郵至iwanttovoice@hk01.com；文章純屬作者意見，不代表香港01立場。）