港男外賣叫雲吞麪！開啟發現無雲吞 外賣平台解釋震驚全網：無恥
雲吞麪「無雲吞」是正常？日前有港男經由外賣平台訂購雲吞麪，不過當他開啟外賣餐盒時，卻不見「雲吞」蹤影，只有湯和麪，馬上向外賣平台反映。詎料客服人員竟回覆，「這邊餐廳表示雲吞麪是齋麪來的，沒有雲吞的，還請閣下理解」，讓他傻眼不已，遂公開對方回應到社交平台，且嘲諷稱「今日學識一樣新嘢，原來雲吞麪=齋麪」。
帖文惹來網民直斥離譜，「齋麪就會係齋麪，無湯的」、「客服個腦係咪擺咗喺屋企」，揶揄「係咪個廚房佬叫雲吞」，並建議樓主向海關方面舉報。不過有人覺得客服回覆未必是「真人解答」，「係咪AI答的？人類應該答唔出雲吞麪是沒有雲吞」、「似係ChatGPT嘅回覆，好機械式」。
外賣叫雲吞麪 開啟外賣盒發現「無雲吞」
涉事港男在threads帳號發帖，語帶嘲諷稱「今日學識一樣新嘢，原來雲吞麪=齋麪」。從其上傳的截圖顯示，他當時經由外賣平台Keeta美團訂購1碗雲吞麪，雖然照片較為模糊，不過都可以看到送達時的雲吞麪只有麪底和湯，而主角「雲吞」則未見蹤影，他於是傳送訊息至美團客服反映問題。
客服回覆：雲吞麪是齋麪，沒有雲吞的
從截圖可見，客服方面竟回覆「這邊餐廳表示雲吞麪是齋麪來的，沒有雲吞的，還請閣下理解，關於餐廳的這個問題我已經反饋至相關部門及時整改，避免再次出現這種情況」。樓主聽聞「雲吞面是齋面」和「雲吞面是沒有雲吞的」很是傻眼，不禁貼出雙方對話，掀起網民熱議。
網民斥客服回應離譜：當人傻仔勁無恥
帖文曝光後，有網民斥責客服的回應「離譜」，「佢哋自己覆完有無笑？」、「餐廳可能放漏咗，人有錯手，但講雲吞麪係齋麪就肯定係呃消費者，視商品說明條例為無物，公然X噏當人哋傻仔，勁無恥」、「齋麪就會係齋麪，無湯的」、「客服個腦係咪擺咗喺屋企」、「畀我就X到佢反艇」、「可唔可以問下佢如果想要一碗有雲吞嘅雲吞麪，應該點叫呢？」，同時揶揄「係咪個廚房佬叫雲吞」、「老婆餅入邊無老婆，雲吞麪入邊無雲吞，好正常啊」。
離譜經歷逐個睇
亦有不少網民分享類似「慘痛」經歷，「我明啊，之前明明係叫上海粗炒，佢就畀炒烏冬我，原來上海粗炒=炒烏冬」、「有次叫米粉畀咗米線，影埋相畀佢都堅持話係米粉，真係X咗出聲」、「我上次都係咁，我覺得佢哋根本無問到餐廳」、「仲癲過我上次食嗰間，我點個牛肉湯面，又係無牛腩，我問佢佢話牛肉湯麪就是『牛肉湯』的麪，如果要食牛肉面，就點『牛肉麪』或『紅燒牛肉麪』」。
網民質疑AI客服代答：好機械式
有人則建議事主應向海關方面舉報，「詐騙嚟，一係報警一係報海關」，惟有留言認為客服回覆未必等於「真人回覆」，「係咪AI答的？人類應該答唔出雲吞麪是沒有雲吞」、「似係ChatGPT嘅回覆，好機械式」。
（threads＠danielchenghair）
