龐景峰秘戀劉溫馨　否認遭母親棒打鴛鴦：屋企人唔知佢存在

劉溫馨近日被拍搭上「星二代」龐景峰，但戀情遭男友母親郭秀雲反對，有報道指郭秀雲對龐景峰舊愛Hailey，故出手棒打鴛鴦新戀情。一對緋聞男女今晚（8日）齊齊出席《邊緣禁地：沙丘喪戰》首映禮，姍姍來遲嘅兩位見有傳媒在場即時分開，但最後亦有應要求合照，但訪問各有各做。

劉溫馨表示近日喺馬來西亞拍劇，剛好有空檔所以返港休息，問到男友有否去探班，劉溫馨即謂無朋友去探班，又多次強調想大家關注她的工作。問到棒打鴛鴦一事，劉溫馨即謂：「無中生有，無呢件事。（即係相處和睦？）無呢件事，無發生過任何嘢，唔係事實，得啖笑。（唔會影響同阿峰嘅感情？）因為都唔係事實，所以唔會理。」

龐景峰表示忙於工作，一講到戀情即耍太極，仲話要搞掂手頭上嘅工作先諗其他嘢，又話公司有唔少員工要養活。講到棒打鴛鴦一事，龐景峰就話：「我阿媽唔識佢，未見過佢，佢又未見過我媽，屋企人唔知佢存在，所以都有啲奇怪。（幾時見家長？）我諗要ready先，不過我唔想成日講私事，所以澄清下，我媽唔識佢，見都未見過大家。」