鄧麗欣提男友「翻版Rain」超冧豬 稱已見家長︰了解過先決定開始
撰文：鄺鈺瑩
出版：更新：
鄧麗欣早前公開認愛「翻版Rain」，今日（17/7）Stephy 同吳君如現身中環，為新戲《我談的那場戀愛》宣傳，大搞Speed Dating 。活動上，Stephy 提到「細節」係會令自己加分，問到新歡是否以「細節」如推門、準時等入手，Stephy即甜笑表示：「呢啲基本啦，我覺得相處先係緊要，大家識咗一段時間，相處過、了解過先決定開始。」
Stephy 又話無諗過咁快被公開，但亦坦言自己防避心已卸下，又謂唔介意讓大家知道。「我係低調。但唔係想隱瞞，因為都唔係啲咩事，但因為對方唔係圈中人，所以我都唔想影響佢，」Stephy拒絕透露戀情開始多久，但有足夠時間了解對方，而早在認識對方一刻，已說明自己藝人身份向男友「打底定」。
問到男友是否真如「翻版Rain」，Stephy笑言「高度似」，又表示對方未有因而在自己面前沾沾自喜，她更反問大家點解會知男友係台灣人？「喺香港識嘅，佢都係喺香港做嘢，朋友介紹識。」問到是否已見家長，Stephy再次甜笑，但問到是否以結婚為前提？她說：「我個人見步行步，同埋唔想咁大壓力。」