【仿傚新加坡】圖書館使用率年年跌　區議員倡增漫畫館藏

本港圖書館的整體使用率近年不斷下降，雖然政府時有出招，希望加強城內的閱讀風氣，但使用人次及書籍的借出率仍不斷變少，無法扭轉劣勢。有區議員提議康文署可增加漫畫館藏，吸引年輕市民使用圖書館服務。

動議圖書館增加漫畫館藏的西貢區區議員何民傑指，今年隨區議會到訪新加坡時，曾到裕廊區的圖書館參觀。「去到都幾驚訝，平日下午竟然坐滿人，我哋去問圖書館管理員，佢話日日都係咁，呢個係正常人流。」參觀時正值超級英雄電影《復仇者聯盟3》上映的時間，圖書館亦正舉行英雄漫畫的主題展覽：「佢哋好積極，用盡各種方法吸引人流。一入到去就會見有個屏幕，寫住10大受歡迎嘅書同漫畫。」

反觀香港圖書館數據，漫畫館藏數量並未有太多，作品題材的種類亦狹窄：「好似我睇完《黑豹》套戲，想搵多啲有關嘅嚟睇，了解黑人文化，但香港圖書館係冇㗎。」雖然社會上可能會有聲音認為，部分漫畫的題材不識合青少年及兒童觀看，但何民傑認為，這種情況在一般小說同樣會發生，重點是家長要輔導小朋友閱讀。「加上有啲研究發現，睇運動類嘅作品，可能會增加讀者做運動嘅動機。」

何民傑早前曾訪問將軍澳居民，1363份有效數據中，有超過95%受訪者同意有關提議，故他早前上呈文件至區議會，希望康文署亦可向新加坡取經，增加漫畫館藏，以吸引更多市民使用公共圖書館。不過，要解決圖書館整體使用率下降，他強調非增漫畫館藏就可扭轉問題，康文署也應在整體管理上作出策略性調整：「圖書館嘅角色同功能要隨時代靈活改變，唔可以墨守成規，𠵱家嘅圖書館同20幾年前、我仲係𡃁仔嘅時候冇乜分別。」