【社區踩場．地獄停車場】長沙灣廣場暗黑玩迴轉登頂　轉到頭暈　

近年荔枝角逐漸變天，不單只有工廠大廈，更新開設不少市集，每逢周末假期，都會吸引一家大細駕車前往。位處荔枝角港鐵站上蓋的長沙灣廣場，是不少人的泊車熱點，今次「社區踩場」就直接踩「上」長沙灣廣場，睇睇泊車難度有幾高，點知，未泊好車已經要轉到頭都暈。

長沙灣廣場的停車場，分別設於3樓及4樓，入場後，首先要面對的，是一條僅容一車通過的通道，雖然未算太窄，但要一口氣先登上3樓或4樓，沿路幾乎是迴轉而上，大車當然要打醒十二分精神，就算細車，同樣要小心，因為環境較暗，轉彎時車身角位容易「擦牆而過」，《香港01》於現場觀察，於通道兩側的牆壁，未發現有太多「簽名」，但駛經的車輛都以慢速駛過，十分謹慎。

入到場內，通道闊度雖足夠大如七人車的車輛通過，但每個彎位均有車輛停泊，而另一側就是柱位，所以轉彎時要加倍留意，避免撞到柱或其他車輛，加上停車場落成近30年，場內普遍亮度不足，建議入場後，記得開啟車頭大燈，可更易掌握場內環境。

雖然停車場內可以貫通長沙灣廣場第一座及第二座，但就只限在4樓平台通過。而最重要是採用單程設計，雖然毋須擔心有對頭車，但要預先選定樓層，如果進入3樓之後，就無法再上4樓，或者從4樓駛入3樓，而要直接駛至出口，離開停車場先可以「返轉頭」。