【米芝蓮．博評】評級機構無處不在：QS、米芝蓮有乜共通點？

最新一期香港澳門米芝蓮指南又出爐。不過今次篇文唔係講飲講食，相信大家冇乜興趣睇——事實上，發唔發現討論嘅人都唔係好多？米芝蓮嘅影響力，似乎下跌緊？另一單早前嘅新聞，反而好多人討論。就係城大畀人話報細學生數目，「呃」QS大學排名同星星，然後再「揭發」QS係收錢嘅。

兩單好似唔關事嘅新聞，涉及嘅都係商業評級機構。大家知道，一涉及錢，就易出事。現代社會，言論自由大過天，所以評級機構無處不在。美食有米芝蓮，大學排名有QS（及其行家），公司或國家信貸評級有標準普爾Standard & Poor's（仲有穆迪Moody's同惠譽Fitch，不贅）

有乜共通點？佢哋都係服務大眾，即係消費者。食飯睇米芝蓮，讀大學睇QS，買債券睇標普。但得意嘅係，資本主義社會，畀錢嗰個，不一定係用服務嗰位（例如棺材，例如小學生課本）。

評級機構點都要請幾條友處理吓數據，寫吓報告，仲要發佈時出嚟包個場。商業社會，最緊要問一樣嘢：邊個畀錢？相信而家冇乜人買米芝蓮本書，維唔到皮。學生或家長亦唔會畀錢買QS排名報告，而買債券亦唔係畀錢先睇到標普對某公司嘅評級。咁，邊個畀錢？

QS大家知，就往往係大學畀錢。你間大學要拎星星？得，畀錢啦，我搵人嚟評審你，仲會教你點拎高啲排名。QS話唔係收錢買星，科水都影響唔到佢，大學亦冇得唔滿意佢最後評級——我嘅演繹係：咪L以為畀咗錢就大晒。錢當然收咗先，畀乜星都仲睇本大爺心情。幾惡。

信貸評級呢？N年前可能係買債券（亦即係借錢畀人嗰位）嘅科水睇報告。自從有咗萬惡嘅影印機同FAX機後，一般都係想發債伸手cap水間公司／政府畀錢。現實係你冇評級，就好難在市場上借到大錢。要拎評級，請先科水畀信貸評級公司。

米芝蓮仲有趣，有冇人諗過，邊位埋單？神秘食客都要出糧（唔通食Robuchon當出糧咩），試食埋單都要畀錢。錢從何來？以前就話出書，同埋，帶動母公司生意（「米芝蓮」本身就係做車軚，N年前嘅初心係多啲人周圍去旅行去搵食，就多啲人買車軚）。而家冇呢支歌仔，咁錢從何來？同樓上兩個例子又有啲唔同，米芝蓮既冇向食家收錢，亦冇同餐廳收錢（其實呢點幾聰明，下面講點解）。但，總要有人埋單嘛。除咗母公司大把錢當過癮做宣傳外，米芝蓮亦都向當地政府收錢：無他，大把人特登為咗米芝蓮餐廳而去當地旅行。下年台北都會有米芝蓮，媒體踼爆話一年要300萬美金，唔怪得車軚人食到咁肥。台灣觀光局否認——但承認有贊助，只係話冇咁貴，仲強調「唔會影響結果」。換句話講：車軚人話你知，錢就斬定你，但唔好以為畀咗錢就實唱好你。

米芝蓮由登陸香港第一開始，已經畀人話冇代表性。QS同信貸評級機構一樣畀人話。但，殘酷而直接嘅回應係：咁叻你自己搞一檔吖。人地開得門做到生意，梗有原因，總唔見城大畀錢你寫個李聲揚大學指南。點解呢類好似「冇乜代表性」又主觀更好似有利益衝突嘅嘢一路存在，仲呼風喚雨咁大影響力，餐廳／大學／國家都要買佢地怕？

原因係，現今社會太多選擇，用家要指引，而自己搵料又唔容易。有錢鬼佬商務客去兩日大阪，食乜餐廳？咁佢乜都唔知的話，都係睇米芝蓮咯。你可以話睇tablelog睇trip advisor，但本質一樣啫。同樣地，我個仔有幾間英國大學唔知點揀，咪睇排名咯，係作參考但好過冇。債主一樣，買烏干達定坦桑尼亞債券？鬼知咩，信評級咯。人類就鍾意排名嘛，電影節N咁多套戲，我都唯有揀啲IMDB或爛蕃茄評分高嘅。米芝蓮QS標普好多爭議，但係咪亂嚟？又唔係，總有個譜，太離譜就自己都唔得掂。

諗通咗，就知道，咩人最怕評級？或者咩人最需要評級？就係唔係太掂嘅人。勁歌金曲畀林峯嗰期。有人話：唔通陳奕迅拎少個獎，佢CD會賣少半張？定係演唱會會賣少一張飛？唔會的。台灣名廚江振誠話唔要米芝蓮星，你估會唔會冇人幫襯易啲訂位？梗係唔會。同樣地，美國都玩信貸評級遊戲，但2011年冇咗最高評級後，借貸成本有冇點升？冇噃。今年9月中國同香港一樣畀人downgrade，又有冇影響借貸成本？唔多覺。唔止，10月中國仲夠膽冇評級之下發美元債添。真係陳奕迅時刻了。

覺得評級機構冇公信力／唔公平，應該點？好簡單，唔理佢。太冇公信力嘅評級，自然會自毀。以前大家仲當樂壇頒獎典禮係一回事，但隨住拍劇換獎甚至買獎之類嘅做法出現，機構又幫自己親生仔女，無線畀得獎林峯，自此咪成為亞皆老街一帶嘅笑話。QS畀人踼爆收錢評級仲要城大超五星，勁過哈佛史丹福，咪即係林峯咯。唔通陳奕迅出嚟嘈咩，哈佛會畀你搶晒啲學生咩。中國自己試過搞間大公評級出嚟（聽名都知正，幾乎以為係太公評級），「打破」鬼佬壟斷云云，最後當然好似孔子和平獎咁得啖笑。可見鬼佬信貸評級公司雖則好多人鬧，但都仲有一定公信力。米芝蓮就惡搞啲，畢竟嘢食比較主觀，你好難話佢呢間三星嗰間一星合唔合理。

而家科技發達，好多資訊都公開，「唔滿意？自己搞一個」未必真係晦氣說話。冇利益衝突唔收錢嘅評級，永遠最有公信力。曾幾何時，消委會嘅《選擇》月刊就夠晒有公信力。悶係悶啲，但冇乜人會質疑佢。政府機構唔一定冇利益衝突，但大家確信《選擇》冇，而本書唔止唔會收公司錢做測試，就連廣告都唔會有——以免有人質疑其中立性。

（本文純屬作者意見，不代表香港01立場。）