【私心預測】2017上位電視男藝員

2016年有ViuTV出世，雞年就即將有奇妙電視加入免費電視市場，個人希望香港電視界大戰可以一觸即發，我哋呢班觀眾就有好嘢睇。不過要有新氣象，除咗幕後創作團隊之外，幕前演員有新臉孔都非常重要。女藝員嚟講，預計2017年同以往一樣，大台都力捧港姐華姐咁，反而男演員就無乜推測軌跡。我方以文就同大家估吓2017年有邊個男藝員有位上。風水佬呃你十年八年，我哋到年尾再嚟個賽後檢討，睇吓我嘅私心選有冇實現到。

何廣沛

由2014年《M Club女人俱樂部》被吳啟華指定演自己後生版嘅麥當當王子，何廣沛（Matthew）就以高姿態畀觀眾認識，成為大台上位男藝員之一。2012年由26期藝員訓練班畢業加入無綫嘅佢，係咁多同期同學仔當中最多嘢拍嘅一個，仲簽埋無綫經理人合約。喺2015年《樓奴》做麥包、簡慕華個囝多多、2016年《律政強人》做方中信徒弟Nick、到近期《財神駕到》做財神托世嘅王招財，嚟緊仲喺解封新劇《親親我好媽》做陳敏之嘅細佬，睇落順風順水。

呢位被吳啟華話「要揀個演自己後生嘅梗係要揀個最靚仔」嘅靚仔，喺唔少人眼中係扶搖直上，但其實佢都經過一段做無對白配角嘅日子（當然呢個日子比起其他人短好多）。包括《殭》裏面一出現就畀人隊瓜咗、得幾個鏡頭嘅無名殭屍，仲有《巾幗梟雄3諜血長天》裏面做行行企企嘅士兵。2012年加入藝訓班嗰時，Matthew話想5年之內有人認得佢，呢個目標已經達到咗喇。當年佢仲有個十年大計，希望十年後可以擔正做男主角，睇個走勢，似乎可以喎！

郭子豪

2014年加入大台之前，郭子豪（Arnold）已經出現喺報紙雜誌，因為佢係當年以剝衫壯男做宣傳嘅美國服裝品牌A&F眾多猛男之一，亦係A&F當年唯一嘅華裔模特兒。唔想淨係做model，郭子豪選擇加入無綫。家庭觀眾可能對佢無乜印象，最眼利嘅可能只係認得佢有份做《廉政行動2016》。不過大台嘅觀眾就嚟會認得佢，郭子豪喺即將播嘅《親親我好媽》有演出，宣傳片都有佢開口講嘢。

而拍咗未排幾時上嘅《三個女人一個「因」》，佢就會一口氣跳升到做第三男主角，排喺袁偉豪、陳智燊後面，做女主角黃智雯嘅老公！以新人姿態加入大台，簽埋經理人合約做埋親生仔，第三年就有咁嘅機會，真係少數中嘅少數，希望佢會有好表現，乘勢而上。

袁鎮業

第26期藝員訓練班班長袁鎮業（Kelvin），最令人記得，同埋最多戲份嘅角色，係喺《一屋老友記》飾演胡定欣嗰間水電舖兩個伙記嘅其中一位「凌波」。一路補襪一路同胡定欣分享愛情觀嘅一幕戲做得幾好，當然一眾女觀眾可能會比較記得佢喺同一套劇裡面剝衫show肌肉嘅戲份多啲。2012年入藝訓班嗰時，袁鎮業佢希望自己10年之內可以做一個有影響力、教育下一代嘅藝人。5年過去，打好基礎向目標進發都咪話無可能。

袁鎮業佢除咗係演員，仲係一位舞林高手。讀大學時已經成日參加學界舞蹈比賽。加入大台之前，仲跟過唔少歌手做演唱會dancer，包括張學友、葉倩文、林峯、鄭伊健。之前大台有條宣傳片，佢就有分跳modern dance，都幾charm。如果大台喺混戰當中開新題材電視劇，又咁啱開歌舞片，就真係開正佢嗰瓣。不過唔同何廣沛、郭子豪，佢無簽到親生仔約。希望大台唔好走寶。

袁鎮業跳舞片段《TVB創新經典節目巡禮2015 》：

譚永浩

譚永浩（Jarryd）又係26期藝訓班嘅同學仔，同班長袁鎮業一樣無簽到親生仔約。不過早喺2004年，已經喺《四葉草2@赤沙印記》裏面出現，做女主角之一陳自瑤Yoyo嘅男朋友。點解未加入大台都有個角色做呢，我搵唔到資料呀…不過我知道佢有把好聲，仲係2010年度英皇新秀歌唱大賽嘅金咪得主！佢間唔時都會自己post啲唱歌片段出嚟，係好聽。另外，佢同另外兩位大台演員盧峻峯、董敬文開咗個facebook page叫做《喂 霞姨》，又拍片又唱歌。仲有拍「深夜IQ題」喺通宵開工時間問藝員同事IQ題，挑戰佢哋最唔清醒時候嘅頭腦。又同袁鎮業演出愛情網劇，算係最勤力利用網絡力量嗰批大台藝員。

成日post片，又喺《安樂窩》同埋《Y Angle》做主持，可能因為咁， myTV SUPER嘅facebook好多時都搵佢主持live，節奏控制得唔錯。加入藝訓班時，Jarryd話希望自己5年後似林峯咁，喺演戲、唱歌、電影都發展得好。十年之後希望喺娛樂圈佔重要地位。繼續努力，向主持發展又得，簽星夢唱歌都唔係無可能。

《2010年度英皇新秀歌唱大賽》部分片段：

譚永浩、袁鎮業主演愛情網劇《好朋誘》：

劉俊謙

劉俊謙（Terrance）同電視界暫時最接近嘅一刻，包括咗拍過嘅唔少電視廣告，同埋拍ViuTV開台前瘋狂播放嘅宣傳片《WEIU》，又或者係佢同視帝黃子華同埋大台前花旦陳法利做嘅嗰一齣舞台劇《前度》。不過好快，佢就會以「新大衛」嘅姿態出現喺ViuTV嘅《瑪嘉烈與大衛系列 前度》當中，同廖碧兒、娘娘杜小喬合作。

高大靚仔嘅「劉謙」明顯sell暖男形象，原著《瑪嘉烈與大衛系列 前度》當中嘅大衛比《綠豆》當中嘅大衛搞鬼，劉謙一定應付自如。香港演藝學院畢業嘅佢，喺舞台劇界已經發展咗一段時間，曾經有傳媒話佢係「演藝李治廷」，我就覺得佢仲靚仔過李治廷。劉謙接受訪問嘅時候話自己想做一個舞台劇演員，亦都想做一個電視演員，不用分得那麼細。我認同呀，好戲就得，黃秋生、蘇玉華、潘燦良、劉玉翠，有辨你睇。

劉俊謙演出廣告：

《瑪嘉烈與大衛 前度》宣傳片段：

馬志威

提到馬志威（Edward），除咗演出過一系列廣告之外，大家可能會記得佢喺吳雨霏2012年推出嘅歌曲《告白》MV當中嘅出色演繹，或者佢同蔣家旻擔正嘅2013年電影《第一次不是你》。佢依家係太陽娛樂旗下藝人，2016年會同劉謙一樣，演出《瑪嘉烈與大衛系列 前度》，以「大輝」嘅角色同「新瑪嘉烈」袁澧林Angela發生一段情。

須知道上一套《瑪嘉烈與大衛系列 綠豆》除咗令到幾位主角人氣急升，亦都令到本來主力喺電戲嘅游學修、林耀聲入屋，多咗電視觀眾認識。今次《前度》，後生嘅主要男演員就只係有馬志威同埋劉俊謙。兩位有實力又有外型，如果配埋天時地利，上位無難度。

吳雨霏《告白》MV：

（上述相片由作者提供，文章純屬作者意見，不代表香港01立場。）