名創優品又涉侵權 本地漫畫界嬲嬲豬
抄開有條癮，繼月頭涉嫌未經授權，抄襲本地插畫師 Darylhochi 設計嘅卡通熊仔「白白」賣電話殼賣斷市之後，中國知名「日本品牌」名創優品，又被指再次捲入另一單侵權疑雲。
本地漫畫家江記（江康泉）星期二喺 Facebook 上載咗一張相，指得到友人通知，名創優品推出一款與卡通企鵝「Duang Duang」crossover 嘅縮骨遮，「Duang Duang」中文名係一個謎，不過望真啲佢個樣，明眼人都會覺得同江記筆下嘅企鵝「丁丁」相似度高達 99.99%！唔通名創優品賣家品只係副業，實際上係專門幫卡通人物尋找失散兄弟嘅慈善機構？連續兩次侵權疑雲，惹來本地漫畫界不滿，呼籲杯葛，研究採取法律行動，其他插畫師都忍唔住出圖揶揄。
喂喂喂，但係點先算侵犯版權先？根據現行嘅版權條例，版權係一項自動賦予創作人嘅權利，完成創作之後，有關作品就立即得到版權條例保護。但係創意日日新鮮，好難訂立一刀切嘅標準，有冇侵權，通常都係交畀法庭決定。不過，之前名創優品香港區總經理黃樹豐接受《信報財經月刊》訪問時，就對抄襲表達自己一套定義：
除非一個 LV，一個 LA，顏色都是啡色、也是方形、也是手袋，那就是模仿。
嗱！雖然一個「丁丁」，一個「Duang Duang」，顏色都係黑白，「丁丁」都有出縮骨遮，但係……但係……設計有分別架！侵權？唔好問我啦，問返黃總……
名創優品自上年登陸香港，已經惹起熱議。明明 2013 年喺內地註冊開店，到 2014 年越洋去日本註冊商標，搖身一變成為「100% 日本品質」品牌。以 AEON 十二蚊店嘅價錢，賣 UNIQLO、無印良品嘅風格，一年半之間，全港已經開咗 35 間分店。背靠祖國嘅香港人，可能早已對山寨貨品見怪不怪，但大型「日本」品牌涉嫌如此明目張膽抄襲，堪稱世界奇觀。
延伸行動：
冒牌產品唔使花心血搞設計，左抄右抄就賣得，通常都比原作平一大截，對我呢啲想過中產生活嘅草根窮人，確係有莫大吸引力。不過，一邊幫襯冒牌貨，一邊唏噓本地創意已死，公平咩？香港人，爭氣啲！要本土！不要山寨！