馬恩國「有槍有炮」　風頭不及訪京團員夜蒲風光

都話電影好多時取材自現實生活，《喜愛夜蒲》就睇得多，今次出現真夜蒲！上個禮拜嘅「一帶一路訪京團」，爆出「團員愛夜蒲」事件，仲拉咗譚惠珠同梁美芬落水，搶晒團長馬恩國「有槍有炮」嘅風頭。

佘英輝與翁繼文，係中澳法學交流基金會組織嘅「一帶一路訪京團」團友，仲同時分別係廣東省潮安縣政協，同交通安全隊高級助理總監，一聽就知是精英，所以可以同另外 35 人，齊齊上京，了解國情。國務院港澳辦、最高人民法院、基本法委員會……一連 4 日去唔同國家機要之地觀摩，羨慕死好多香港人。

但正所謂「你有壓力，我有壓力」，有壓力當然要發洩一下。根據幾乎全港傳媒報道，二人留京期間，日頭落力了解國家大事，夜晚決定輕鬆一點，難兄難弟晚晚結伴到 KTV ，唱歌之餘，識下露臍低胸的性感新朋友，又貼面又搭膊頭。本來私事冇人知，但兩人可能放鬆得滯，忍唔住要將同性感「表演員」貼面合照，喺 WhatsApp 向朋友「包膠」。開心事傳千里，就梗係話咁快通晒天，成功佔領頭條！

嘩，邀請你哋去了解國情，變成去了解夜店行情，可怒也！消息指，北京嬲到經中聯辦要求有份夜蒲嘅團友「自首」，發現當晚同場仲有一個警隊總督察。

好喇，揚咗出嚟，跑 16 層樓梯都冇用。佘翁二人都心知不妙，即日辭去中澳法學交流基金會嘅職務，並各自發出相異其趣的聲明：佘英輝表示學到教訓，深切反省向各界人士致歉；翁繼文呢，自撐是「性情中人」，當日純粹「聞歌起舞」，嗰間 KTV 「非常正派」，絕無摸下體或越軌行為。之不過，辦國家大事順道光顧夜店，呢種性情真係嚇親人，試問邊個老細接受得到？交通安全隊翌日立即將二人停職，再由管理層展開調查。

唔止老細接受唔到，女士都接受唔到。譚惠珠貴為該基金會榮譽顧問，星期日先拆完「槍炮論」，而家又嚟多個「夜蒲團」，嬲到學李聲揚，大叫一聲「我唔 X 撈喇！」（設計對白），即時割席。基金會另一高級顧問梁美芬，星期三亦都「斬纜」辭職，話作為女性議員，絕對不能接受有團員夜蒲。

另一嬲爆的可能係特首梁振英。講到尾，「一帶一路」是梁特施政報告重中之重，講足四十幾次咁多，而家竟然同「夜蒲唱 K」掛鈎？！難怪梁特要講句，不論身在本地定其他地方，港人都應該關注自己個人行為。

受波及最深的，應該係馬恩國大狀，話晒呢個團之所以叫「中澳法學交流基金會」，唔係「中國與澳門基金會」，而係「為香港及澳洲法律界瞭解中國大陸法律」，都係因為主席乃澳洲籍愛祖國大律師馬恩國。星期六佢帶訪京團返港之後，引述基本法委員會副主任張榮順，話若中央要處理港獨，「要槍有槍，要炮有炮」，嚇親中港同胞，連曾鈺成都要回應，本來風頭一時無兩，點知「夜蒲團」一出，連續幾日佔頭條，難怪馬大狀只能無奈講句，「佢哋要玩，我都冇辦法控制」。

黨友見馬大狀慘慘豬，驚影響立會選情，紛紛幫佢說項，例如蔣麗芸話，「去KTV消遣無所謂，關鍵是否『正常、乾淨』」；譚耀宗就話，訪京團並非以民建聯名義舉辦，馬恩國亦冇份夜蒲，唔會損害民建聯聲譽。點都好啦，每個人都要為自己嘅言行負責，到底仲有幾多人有份夜蒲，仲有幾多內情未爆呢，記得緊貼《香港01》嘅深入報道！

 延伸行動： 
由《喜愛夜蒲》系列、《一路向西》、《豪情 3D》、《鴨王》……套套「夜蒲」電影都離唔開香港或者珠三角地區。香港人目光唔好咁淺窄，要放眼祖國大地，一於快手拍返套《訪京夜蒲團》，介紹北方山水好風光，必定大收旺場。