【英超．博評】雲尼亞里一無成就？反駁李聲揚《李斯特城》文章

雲帥第一次帶領華倫西亞時，就帶領球隊踢入歐聯，而且亦得過國內盃賽冠軍……執教法國摩納哥，亦只用兩年時間奪得乙組冠軍，並於升班第一年奪得甲組亞軍。一無成就？我笑而不語。

【編按：本文乃作者對另一博客李聲揚之文章《李斯特城極速炒領隊，打工仔有乜啟示？》的回應。】

不應全部歸功於自己，記住幸運女神在笑。特別第一次成功嘅，真係唔好將自己放到咁大。

看到「博評」同行這樣說雲尼亞里，真係不吐不快。如果讀者有緊貼上年英超既情況，會發現雲帥去年一直保持謙厚態度對待傳媒，就算聯賽到末段時仍多次對外宣稱奪冠之說仍然言之過早。雲帥一直並無吹捧自己能力，並多次感謝球迷及球員努力，只稱一切如夢境，的確未能看得到全部歸功於自己之說法。

就連贏波食Pizza又係成功之道（必然激死嚴控球員飲食嘅真名帥哥迪奧拿）

強壓管理同懷柔管理，乃個人手法，基本上不能比較。你如何拿北韓跟美國比較？兩種完全不同的管理模式根本不存在相同之處，拿來比較只顯示出你的無知，與現今火熱的猶太人論如出一徹。但如果身為打工仔一族，你會喜歡那一類型的老闆多一點？獎善罰惡，同時可以與你打成一片；還是高高在上，不聽半點意見？相信十個打工仔有九個都會認為前者較好。強壓管理既表表者摩連奴及雲高爾，在重返車路士及曼聯年代已證明了球員也是打工仔，強壓管理並不代表一定會成功。

雲帥之前教十幾隊波，基本上一無成就，上年威返一次又能代表什麼？

如果翻看雲帥的履歷表，絕對不算得上一無成就。雲帥第一次帶領華倫西亞時，就帶領球隊踢入歐聯，而且亦得過國內盃賽冠軍。進入車路士年代，引入了林柏特、施治、馬基列里、加拿斯等球員，又任命了泰利為隊長，在位時雖只贏得聯賽亞軍，但為球隊日後成功種下重要基石。雲帥可能唔係贏過好多冠軍，但擅長補鑊、重建球隊，譬如在陷入財困既帕爾馬年代（2007年），雲帥於第23周接手，將球隊一手由降班區爬升到聯賽第12位畢業。接手祖雲達斯又係重建期，但他依然可以帶領球隊於升班首季便奪得聯賽季軍。然後執教法國摩納哥，亦只用兩年時間奪得乙組冠軍，並於升班第一年奪得甲組亞軍（冠軍是財雄勢大既PSG）。一無成就？我笑而不語

庸才總係將幸運當係自己嘅才華同努力。

引用這句，雖然並無指名講雲尼亞里，但相信大部份讀者看罷都會覺得這個引用乃衝着雲帥而來。如果贏唔到盃係庸才，贏到又係幸運，你講曬啦！如果人人都要無夢想，唔追夢，同要樣樣計算，咁既人生都幾可悲！唔係樣樣嘢話追夢就可以成功，但唔追就一定唔成功，戲都有話：做人無夢想同條鹹魚有咩分別？

（文章純屬作者意見，不代表香港01立場。）