【武術01】變變變生命力：袋鼠格鬥術

「唔係卦，袋鼠都關你事？」
其實真係唔太關事

最近有段「街交」片好多人睇，大家知我唔鍾意街交，所以我就本應唔講嘅。不過因為肇事者係隻袋鼠，決定同大家講下。

首先講明，我都係睇片分析，真袋鼠都只係喺動物園見過，更枉論交過手。再者，大家都唔應該無啦啦傷害動物。

不過，如果他朝有一日，突然有袋鼠一言不發，就過嚟打你，雖然你知佢應該係點錯相，但講極佢都唔聽。咁以下落嚟嘅袋鼠技術分析，話唔定可以救你一命。

上身攻擊

首先好多人一諗，就諗起袋鼠拳擊。袋鼠拳擊係澳洲常用嘅吉祥物，好多運動隊都用。但其實袋鼠好少用拳。

好多時你會見到兩隻袋鼠打交，都會伸隻手出嚟抓人塊面。而為咗防止被抓中，佢地都會頭向後傾。可以見到佢地隻爪都幾尖下，抓中眼耳口鼻都幾大獲。

如果見到袋鼠伸出雙手想抓你塊面，呢個時候你一係保持距離，一係圈手拍開佢嘅鼠爪手。不幸抓中，就由內向外拍開隻手，之後推開佢。

下半身攻擊

大家留意到，其實袋鼠最主要嘅攻擊手段，係跳起雙前撐。仲要唔係側飛而係直飛。

雙飛踢嘅問題在於，踢完係會成個身訓落地嘅，唔識用可能仲傷過對手。但係袋鼠因為有條尾嘅關係，就無呢個問題。所以話唔同體格，就有唔同打法。

袋鼠嘅攻擊點係對方下盤，打中大腿都無咁傷，如果打中小腹、膝關節、要害嘅話，真係諗起都痛。

雙前撐同前撐一樣，可以用嚟截擊，又因為袋鼠精悍嘅腳，加上可以依靠條尾挨後出腳，前撐嘅距離又變到同截擊膝一樣。所以如果你想埋身出拳，就好可能會被佢踢中。就好似UFC 178，Eddie Alvarize 對 Donald "Cowboy" Cerrone，Eddie 想埋身出拳就俾Cowboy膝中一樣。

其中一個應對方法係靠假動作，用 In and out movement去令隻袋鼠先出腳，喺佢踢唔中失平衡或者收腳嘅時候先攻擊。

鎖技

袋鼠都識鎖技？無錯，係識嘅，唔知幾時開始，袋鼠就識得用RNC（裸絞）。睇片你就明（由30秒開始睇，都幾嚇人，好彩最後兩隻袋鼠都無事）：

為快不破

以下呢段片就係最近好多人講嘅「街交」片。有隻狗狗被袋鼠鎖緊，主人決定過去救佢（由20秒開始睇）：

可能係覺得自己好勁，又或者睇死對手唔敢打佢，片中隻袋鼠係無護頭嘅，而主人好快一個jab打埋去，打中之後可以即時見到袋鼠不憤、疑惑、驚訝嘅樣子。

而主人喺呢個時候就做咗一個非常好嘅決定：走。救咗狗，隻袋鼠又嬲嬲緊，無謂繼續糾纏落去。

講返條片，有人話主人英勇，亦有動物權益團體話咁做唔岩。但果時情況危急，主人都無時間理咁多，出手救狗都係人之常情。最後大家都無事，都係一個好結果。好似主人背後仲有故事，但呢到就唔多講啦，都係focus返隻袋鼠。

至憎人虐待動物

好啦，以上我都係講下笑，關於點樣避免同袋鼠發生衝突，大家應該問問生物學家，唔好以為睇完就可以去打袋鼠。好多野生動物，包括袋鼠，都有攻擊性同一定危險性，唔好去招惹佢地呀。

仲有，嗰種人同動物打交嘅「表演」我都係唔支持嘅。你唔係同佢打交，你只係虐待佢，佢亦無話過想同你打，最後傷到人或者傷到隻動物都唔好。想睇搏擊，睇拳賽咪得囉。

今日係咁多！

（本文純屬作者意見，不代表香港01立場。）