【春嬌救志明．影評】大個仔喇，千祈唔好再拍第四集喇！

所謂事不過三，《Fast and Furious》或者占士邦片就可以長拍長有，但劇情片拍到三集而唔變爛嘅，少之又少。
《志明與春嬌》系列拍到第三集《春嬌救志明》，身邊朋友未致於一面倒負評，但大家都希望唔好拍第四集《志明救春嬌》了。

《春嬌救志明》好唔好睇？如果你冇睇頭兩集，或者第一次睇彭浩翔，咁應該覺得好好睇。你當佢係個新導演，就十分好睇添。但問同彭導以及志明春嬌一齊成長嘅人（例如我），應該會答你有啲失望。朋友話好似去開啲餐廳咁，其實跌 watt 不少，但始終有感情，亦想其他未食過嘅人去試，所以唔想講得太盡。

我自覺比好多人更有資格講彭導，因為我真係佢 fans，甚至佢未拍戲之前已經係。大學時睇佢嘅小說《進攻女生宿舍》同《黃昏動物園》，完全被佢古靈精怪嘅念頭，以及對生活細節嘅觀察力所征服。

佢導演嘅戲，我全部睇晒，有啲睇兩次，《伊莎貝拉》我睇咗三次。我亦認為自己係佢嘅「目標觀眾」，代入到佢嘅電影。畢竟佢嘅戲主要係拍比 1970s 中至 1980s 頭出世嘅人睇（佢，楊千嬅同余文樂亦係呢個年代），呢班人唔會老到唔明咩係「da-me smoke」（唔畀食煙），但亦唔會後生到未聽過 Raidas 嘅《傳說》。

彭導在《伊莎貝拉》同《香港仔》已經證明咗佢嘅深度，以及拍「正經戲」嘅能力。佢嘅戲唔係只得粗口（特別係女人講），黃色笑話，懷舊廣東歌同小聰明。《志明與春嬌》系列最煞食嘅唔係呢啲嘢，而係彭導自己對身邊事物，以及男女關係嘅觀察。呢點彭導比起杜琪峰葉念琛更加貼地，至少對 70 中 80 頭嘅觀眾嚟講係。當年嘅楊千嬅同余文樂都係冇乜演技嘅偶像派，撐起成套戲嘅無疑係劇本同彭導本人。但不幸地，去到《春嬌救志明》，就好似倒退到靠返粗口，黃色笑話，懷舊廣東歌同小聰明呢四大法寶。

第一次睇彭浩翔你就以為睇「屹屹剛」係入錯戲院，就會對啲「正經」女仔講粗口咁流利咁賤好驚奇。但睇過兩集嘅，就明知陳逸寧一定會講粗口，明知成班女會唱《傳說》（其實呢幕有乜謂？）。我甚至一見到個 Dali 已經知佢會玩「指公環」，講「小不忍」我已知下一句係乜，就連「白毛女」呢個 gag 亦知佢實玩。

講呢啲唔係想講我有幾醒或幾了解彭導，而係好多觀眾同余春嬌一樣，冇咁好氣，一早估到你搞壇咁嘅大龍鳳啦。我唔會因為一套戲覺得彭導回晒塘，江郎才盡。佢係香港近十幾廿年其中一個最有才華嘅創作人，但在呢個系列，佢應該已經玩無可玩了。

第一集《志明與春嬌》，叫好叫座，夠創新。原來都市愛情片可以咁拍，在杜琪峰嘅舊式白領男女愛情，同葉念琛嘅你偷食我出軌你再出軌之外，自成一格。第二集《春嬌與志明》，愛情同生活嘅「中港融合 + 矛盾」，合拍片味極重，但彭導一樣處理得好好，好多人認為係少數成功嘅合拍片。而現實中我呢位目標觀眾，當年亦有朋友北上搵食，在北京層樓個火爐啪啪聲，但亦有感情受到北方佳麗（或小鮮肉）挑戰嘅。呢套戲亦有彭導自己嘅個人經驗，聞說佢亦係嗰期開始北上成立創作室，同埋在北京買樓（否則佢唔會識上「床吧」）。

第二集春嬌最後擊退「北方 + 空姐」兩大原罪嘅尚優優，睇到女性觀眾好開心。彭導甚至將同一條橋拎去玩《撒嬌女人最好命》，香港變大陸，大陸變台灣，楊千嬅變咗周迅，余文樂變成黃曉明，楊冪就變成隋棠，係有點懶，但一樣好睇。

去到今集《春嬌救志明》，理所當然就係講到「合久必婚」呢個問題，以及要為永遠長不大嘅張志明嚟個了斷。眾所周知張志明有彭導自己嘅影子（都係處女座），余春嬌亦都有（父母離異），但現實中彭導其實結咗婚十幾年。唔知係咪因為呢個原因，到佢拍今集嘅題材，就明顯冇之前兩集處理得咁好。張志明一路都長唔大，今集佢嘅「成長」係重點，似乎彭導成長得快過張志明太多，反而拍唔到嗰種感覺。

今集嘅跌 watt，由戲入面嘅「金句」亦睇到。之前嘅「成世人流流長，總會愛上幾個人渣。」「我好努力咁脫擺張志明，但最後我發覺，我變咗另一個張志明。」真係相當有意思。「男人過咗 30 歲出差都未坐商務位係 loser。」「空姐要畀人非禮三次先可以報畀機長。」之類，我坐飛機（無論係坐經濟定商務）出差都會同同事講，有時都見到空姐會忍唔住笑（我坐飛機梗係望空姐，唔通望同事？）。「粉紅色乳頭，可遇不可求。」「睇相就公主，睇樣就蕃薯。」冇乜特別意思，但我同朋友今時今日都仲講緊。今集呢？你覺得有邊句嘢好到肉？會令你十年後仲記得？係以後見到「可兒」你會話佢「好 X 可疑」？定你會改隻狗名做「跟住」？

我好相信套戲會收得，而亦好多人笑得好開心，至少我在電影節睇首映時係咁（但到我在台北睇第二次時觀眾就冇乜反應了）。對，片尾嘅「余春嬌打救張志明」我仲笑得出，見到秦沛吳岱融都幾開心，但亦僅此而矣。成套戲更加似係彭導為自己而拍，Dali 係佢私伙嘢，surfwheel 都係，我估 Supreme 磚頭都係，就連《傳說》都係佢自己參加歌唱比賽嘅歌。作為睇咗佢咁多年嘅觀眾就當知多啲佢嘅嘢，但就戲論戲，就真係追咗咁多年睇埋個結局——而真係千萬千萬唔好再拍第四集。

但誰知道呢？彭導自己都話最唔想拍續集，但呢個系列依然拍咗三集。可能係商業考慮（上次《香港仔》唔收得），可能只係真係佢好鍾意呢兩個角色。既然係咁，就唔好玩到爛為止啦。

（本文純屬作者意見，不代表香港01立場。）