從賀歲片發展看香港的高低起跌

2000年周星馳唔玩，賀歲檔可謂最黑暗嘅一年，冇雙周亦冇一成，只得郭富城……2008年卒之有周星馳啦，但已經係擁抱大陸市場嘅《長江七號》，講真，大家都睇得不是味兒。片爛唔爛都其次，係大家都知，屬於我哋嘅年代，已經過去。

賀歲片死咗未？睇你點定義。

用「賀歲檔華語大片」嘅廣義，賀歲片當然冇咁易死。因為賀歲檔，依然最容易搵錢。雖然過年氣氛越嚟越薄，但戲院在呢個檔期，都仲有相當強嘅慣性收視。所以即使華語片好似越嚟越頹都好，賀歲檔都仲係兵家必爭，拍戲嘅往往投放唔少資源（係咪高質就另一回事）。

證據？賀歲檔嘅戲，多數都打入華語片票房十大。舊年《美人魚》，《賭城風雲III》同《西遊記之悟空三打白骨精》，我全部有睇。即使只計華語片，呢三套都稱唔上係佳作，但一樣進佔全年華語片票房二三四位。 

但如果講狹義，「喜氣洋洋」片先係「賀歲片」，咁去到今年連《賭城風雲》系列都冇埋，真係冇人同你恭喜發財了。對，黃栢基導演葉念琛監制嗰套《我要發達》，我一樣有睇，有邵音音同大家拜年添。但你知道唔係嗰回事了。得罪講句，換著三十年前，明星使鬼嚟屯門同你拜早年咩。而雖然麥迪文都要同景甜打怪獸，但至少未來幾年我都想像唔到Ryan Gosling跳完舞片尾出嚟同你恭喜發財。

歸根究底，賀歲片基本上係香港發明。而賀歲片嘅起落，亦同香港電影，甚至香港嘅起落同步。賀歲片就係香港命運嘅寫照。作者自覺唔算好老，但都叫做由《最佳拍檔》睇到去《賭城風雲》，同大家快手回顧下不同年代嘅賀歲片，同埋當年嘅香港係點（當中年代當然有重疊）。

1.《最佳拍檔》年代（1982－1986）

夠老嘅香港人會話你知，新藝城1982年拍嘅《最佳拍檔》，係賀歲片嘅始祖。 King Kong許冠傑拍光頭佬麥嘉好多人識。但唔係太多人留意到，導演係曾志偉，編劇係黃百鳴。See？之後幾十年，都仲係呢班人主導香港流行文化。

套戲的確無敵，絕對適合大家懷緬，超過200萬人入場睇，2600萬票房。1982年嘅2600萬喎！計今日票價，等於近1.5億票房。唔好話港產片，就算計晒所有電影，應該只係得《阿凡達》可以相比。嗰個當然係香港電影，甚至香港嘅黃金年代。套戲仲會在日本同步上。你想唔想像到而家日本人在東京入場睇《我要發達》睇麥玲玲同阿Bob談情？

但巴閉嘅背後，當年香港流行文化嘅成功， 唔多唔少多得大陸未開化，全球化又未去得好盡，又冇得上網，大家見識少。事隔咁多年，睇返《最佳拍檔》， 唔覺得咁好睇了。許冠傑麥嘉Odd couple嘅設定好多西片都有，而套戲好多橋段亦擺明係抄占士邦片。而家再拍一次，你只會覺得小兒科。

2.《富貴逼人》系列（1987－1989）

對我嚟講，呢個系列先係真正賀歲片。《富貴逼人》夠晒原創，相對地唔算大製作，董驃同肥肥沈殿霞孭飛，稱不上粒粒皆星。成套戲就靠當時編導，德寶嘅高志森。同埋勝在夠貼地。講公屋，橫財夢，拜年，白鴿眼，移民潮。驃叔義正辭嚴咁教訓大家「移民係不負責任嘅行為」，但同時亦話你知「我哋中國人唔興（民主）呢套」。想了解九七前香港人精神面貌嘅，記住搵嚟睇。

套戲成功背後，又睇到當年港產片食老本嘅作風。同殭屍片，猛鬼XX，霸王花，古惑仔一樣，有人成功，就有人抄，一窩峰去拍，或者自己都不停重覆，拍到爛拍到你爆粗為止。對，而家荷里活都係咁，但人地可以賣埠全球，仲有得出公仔。你幾時出款Q版大天二？「包皮」英文叫乜？

一年一套，1989年拍到《富貴再三逼人》，仲係德寶，但換咗導演，票房即時插水。1992年高志森自己拍《富貴黃金屋》，更加仆直。唔止，1989年仲有套疑似「外傳」，嘉禾拍嘅《富貴開心鬼》，都係董驃肥肥，成家中頭獎但漏煤氣死晒但都仲想移民，夠晒大吉利是。套戲爛到仆街，建議你搵嚟恥笑下。

講到尾，嗰個年代，連戲入面驃叔都去埋加拿大。最緊要就係搵快錢，買樓， 移民。以為「香港人一向好關心政治好愛香港」嘅，不妨搵嚟睇下。

3. 雙周一成時期（1990－1999）

之後差不多成個1990年代，係「雙周一成」年代——周潤發，周星馳同成龍。 如果講賀歲片，基本上係周星馳主導，《整蠱專家》，《逃學威龍3之龍過雞年》，《行運一條龍》（對，「年初四咁嘅樣」嗰套），當然仲有好多人最愛嘅《家有囍事》——留意，近年黃百鳴高志森畀人鬧到七彩，呢戲正係佢地作品。

周星馳唔靠抄西片，亦唔靠大場面大明星，真係一個人天才波擔起成堆戲。但對我嚟講，呢個年代已經係開到荼蘼了，而周星馳嘅賀歲片亦唔係佢嘅代表作，頂多只有《整蠱專家》算好好睇。正如周潤發同成龍嘅代表作都唔係賀歲片。

呢個年代就係香港文化最後光輝歲月，對我嚟講，「賀歲片」呢樣嘢，由1999年開始衰落，關鍵亦都係周星馳唔玩。當年周星馳拍埋《喜劇之王》，你可以當係佢最後一套「港產片」，之後佢拍嘅係《少林足球》，正式去除「港味」。

4. 黑暗期 （2000－2009）

2000年周星馳唔玩，賀歲檔可謂最黑暗嘅一年，冇雙周亦冇一成，只得郭富城。《公元2000》票房唔掂。高志森黃百鳴再翻叮許冠傑麥嘉嘅《大贏家》， 票房更差。收得嘅係《東京攻略》同《決戰紫禁之巔》，但質素如何大家心照。打後咁多年，頂多得套《嚦咕嚦咕新年財》多啲人講。呢個年代亦正係港產片嘅黑暗期。

正式為「賀歲片」劃上句號嘅，我認為係2007年嘅《門徒》。一路以嚟賀歲片都係鍾意嘻嘻哈哈如意吉祥，唔大團圓結局都唔好死人冧樓。2007年《門徒》打破晒所有禁忌，夠晒大吉利是。到2008年卒之有周星馳啦，但已經係擁抱大陸市場嘅《長江七號》，講真，大家都睇得不是味兒。片爛唔爛都其次，係大家都知，屬於我哋嘅年代，已經過去。

5. 迴光反照？（2009－）

不過真係柳暗花明又一村，我以為「賀歲片」就咁收檔之時，2009年就重生了。而居然係多得黃百鳴。佢拍返《家有囍事2009》。固然唔好睇，但叫做係重新搞起「賀歲片」呢樣嘢。之後幾年，就有曾志偉拉埋TVB同佢鬥。

話我壞品味都好，我都真係仲懷念嗰幾年。到2014年，兩個「化敵為友」， 一齊拍《六福喜事》，就更加唔掂。其他選擇？亦係同一年，王晶拍第一套《賭城風雲》。之後兩年一年一套。我無意批評王晶嘅政治取向，言論或人格，但就戲論戲，即使當胡鬧喜劇或睇明星都好，三套《賭城風雲》都仲係好唔掂，仲要一套比一套差。但冇關係，三套都入華語片票房十大的。又再證明啲觀眾只係把口話杯葛，實際上大把人都係照睇。

以為王晶好唔掂？今年就王晶都冇得你睇。得返《我要發達》，好難唔話賀歲片已死。卒之開始有人懷念黃百鳴曾志偉了。但又怪誰？黃百鳴2015年破格地拍過套《浮華宴》，絕對係有誠意之作。但收得兩百幾萬票房之餘仲要畀人狂媽， 而媽嘅十個有十一個都冇入場睇過。證明賀歲片嘅嘢，觀眾要垃圾就畀垃圾佢食啦，唔使誠意的。有咁嘅觀眾，咪有咁嘅電影。

（文章純屬作者意見，不代表香港01立場。）