港豬與蛇齋餅糉的剋星：加權投票

Weighted vote（加權投票）一向有人講，儘管真係冇乜地方成功實行過。今次好多年輕人都覺得，喂，廢老做乜決定咗我哋將來？的確有人講，不如老人家冇得投票，或者，至少佢嗰票計八折，或者跟剩返幾多預期壽命去投？……以上所講，全部係禁忌，政治不正確。但反正呢幾年興番回歸政治不正確，我唔係完全支持，只係提早去話你知房入面有隻大笨象。民主塔利班（我作的詞）當然高呼「可怒也」，因為以上講法挑戰咗「人人平等」嘅基本原則。但諗深一層，其實呢啲原則，唔係你想像中咁神聖。即使講投票都從來唔係「人人平等」。

我有個習慣，坐飛機或去旅行，會睇平時唔得閒睇嘅舊雜誌。傳媒趕死線，網媒更加樣樣鬥快，但我有時就寧願慢少少，「讓子彈飛一會兒」，唔好跟車太貼。隔一排睇返件事，更有得着。

脫歐派若生在香港　係叫做「港豬」

英國脫歐已成定局，講再投呀、冇法律效力呀之類，同我見德國落後兩球希望對手打球證被踢出局差不多。但，脫歐係一個漫長過程，影響慢而深，實在係應該慢慢討論，唔係趕在嗰幾日鬥快寫文。

我都冇得投，亦唔想肉麻到講自己係乜鬼國際公民（人唔笑狗都吠呀）。但唔使你估作者立場，有得投，我當然投留歐。我接觸嘅人，亦絕大多數都係留歐派。包括在英國的舊同事、留學生朋友、遠房親戚、關注嘅網友等等。當然有 bias。呢班人你睇背景都知係留歐。教育程度較高、較為富有。更不用講有不少係在英歐人，或在歐英人。佢哋唔係北英格蘭的憤怒礦工。而工作關係，我睇嘅多數係《金融時報》或《經濟學人》，斷估我都唔會日日睇《Daily Mail》。所以我見嘅當然唔係全部，但只能就我見到嘅講。

我見到嘅，當然係佢哋媽聲四起。十分合理，既得利益者嘛。但同以往情況（例如大選）唔同，今次我見到，佢哋除咗唔滿意結果外，仲十分明顯地，矛頭指向脫歐政客、制度缺陷，同埋……班選民。

佢哋都講得好明。簡單嚟講，就係脫歐政客無恥，妖言惑眾；而選民腦殘，易被煽動，個個係阿毛，都唔知投咗有乜後果。仲有班老而不自私，佢哋就兩腳一伸我死後哪管洪水滔天，可憐啲年青人有排受。

傳媒早報道過，脫歐同留歐，係兩類人。留歐係後生仔、大學生、金融才俊之類。倫敦不用講，而大學城劍橋、牛津、布里斯托全都留歐。朋友講話伯明翰唔係，只係因為伯明翰並非真係咁「大學城」。脫歐派普遍年紀大、教育程度低、收入低、住在工業或唔知有乜業的城市。在香港，我哋叫呢啲做「港豬」、「廢老」、「維園阿伯」、蛇齋餅糉。你懂的。我大膽講，呢類意見係英國不少「知識分子」或「才俊」的諗法。

要幾民粹有幾民粹　民主你個頭

不過在香港社會就唔同了，香港不少評論，包括聲稱英鎊冇跌穿十算嘅陶傑，都話：喂，人哋英國人好優秀，決定自己民族嘅前途，成個過程公開公正，少數服從多數，民主示範呀，梗係你啲華文媒體有大一統大中華情意結，先咁反感輸打贏要。

Really？你肯定呢個就係「民主」？我懷疑你識唔識乜嘢係民主。定根本好多人，以為民主就只係投票，少數服從多數？英國人真係「選擇」咗自己的前途？有咩？

我就傾向同意啲外國朋友，覺得成件事係一大鬧劇，畀你睇到戀英青年捧上天的英國，啲公民質素都不過如此，貽笑大方。傳媒政客更加要幾醜陋有幾醜陋，要幾無恥有幾無恥。

何解咁講？即係，選民後悔好正常，我點完 A 餐往往都後悔想點 B 餐。幾百萬人聯署都不能當真，52 - 48，冇人唔服先奇。不過呢，啲電視上嘅選民，真係醜態盡現。你可以睇下 BBC 來自曼徹斯特嘅 Adam，或者 ITV 的 Mandy Suthi，笑死冇命賠：

「點知會咁大鑊喎」
「諗住發泄下咋，點知真係會脫歐」
「好後悔呀，諗住可以拎多啲談判籌碼之嘛，點知我嗰票真係咁重要」

當然，講英國公民點優秀嘅，會話你知，個別例子啫，傳媒抹黑。不過 Lord Ashcroft 的調查一樣話你知，脫歐係乜人？就係反對多元文化、反自由主義、唔講環保、唔講女權、怕互聯網嘅嗰堆人。你懂的。

好，到啲政客，更加唔使拗。拆大台、種族牌、假承諾、靠嚇，乜都出齊，要幾民粹有幾民粹。仲話畀大家知，可以有着數冇付出。而說好了的「慳番 3.5 億鎊畀 NHS」（國民保健署），投完第日就變八萬五咗，快過意甲拉素換領隊；正如趙匡胤黃袍加身後，最初說好了南侵的遼國士兵，當然齊齊打邊爐。

傳媒呢？《Daily Mail》呀、《Telegraph》呀之類，長期都誤報歐盟嘅新聞。《經濟學人》等當然拎出嚟狂鬧。但普羅大眾覺得呢啲友離晒地。你鍾意企邊面，隨你。但問良心，你信邊份報紙？而脫歐報長期作新聞，就係唔使拗的事實。《太陽報》脫歐派一號打手 Kelvin MacKenzie 喺投完幾日已經話好後悔。想唔想像到講香港自決嘅，在公投後話你知好想返番祖國？

一人一票擔保民主？　民主唔止得少數服從多數

個別香港評論員，講咩民族榮譽呀、自主呀，其實一樣咁錯。由於冇人打算唔同歐盟貿易，所以英國九成九會跟而家嘅「挪威模式」。咁會點？我話你知，挪威交嘅歐盟會費，多過好多成員國。同時間，挪威收嘅難民數字（計比例啦），仲多過而家英國。咁但係當然呢啲嘢冇人會聽。自主榮譽下話？等加稅啦。

至於講咩民主精神，基於以上嘅種種，你肯定啲選民投票時知道自己做緊乜？ 投票前有足夠而正常嘅討論？定覺得總之有投票就係民主？不如話你知，52 – 48，七成投票率，即係合資格選民中僅有 36% 嘅人支持，就已成功脫歐，當中仲要唔知有幾多知自己做緊乜。

你參考下其他地方咁大件事，係咪咁低門檻可以過到？Kenneth Rogoff 話齋，呢個唔係民主，係俄羅斯輪盤。更唔好忘記，呢個公投 winners（if any）take all，唔會有比例代表「部分入歐」。咁，仲係 36% 就好民主？某程度上，個門檻，仲低過要調低法定飲酒年紀。

英鎊就大跌，但英國股市甚至反彈到高過未公投前，環球其他地方金融市場都 ok。咁啲倫敦朋友就當然冇咁多嘢講。至少講倫敦獨立都應該只係講下。但目光放遠啲。英國脫歐只係第一響，之後呢啲咁嘅反智民粹投票，陸續有嚟，重頭戲當然係美國。

於是，有人已經開始挑戰好多人心中嘅禁忌。就係挑戰一人一票，你一票同我一票平等。聽落好似天經地義，但其實唔係。

大膽預言：跟壽命計的加權投票有機會成真

Weighted vote（加權投票）一向有人講，儘管真係冇乜地方成功實行過。今次好多年輕人都覺得，喂，廢老做乜決定咗我哋將來？佢哋衰咗兩腳一伸唔使煩，我哋有幾十年受喎。的確有人講，不如老人家冇得投票，或者，至少佢嗰票計八折，或者跟剩返幾多預期壽命去投？又或者，有仔女嘅，計多 20% 丫（然後回教徒最多票，嘻嘻），呢啲人先會顧及下一代嘛。大把玩法。

同樣地，朋友提議過，個投票權應該係考返嚟，唔係預設就有。聽落都合理，開車都要考牌，咁因乜可以畀連歐盟都唔知係乜要上網 Google 嘅人，或者一路收援助一路問「歐盟做過乜」嘅人，去投票決定你未來？香港一樣，你見投票站一車由老人院運去嘅「掌心雷」，好多人覺得唔應該有得投——你連投邊個都未知喎大佬。

以上所講，全部係禁忌，政治不正確。但反正呢幾年興番回歸政治不正確，我唔係完全支持，只係提早去話你知房入面有隻大笨象。民主塔利班（我作的詞）當然高呼「可怒也」，因為以上講法挑戰咗「人人平等」嘅基本原則。但諗深一層，其實呢啲原則，唔係你想像中咁神聖。即使講投票都從來唔係「人人平等」。

差不多所有社會，都有最低投票年齡，對不？咁已經假設咗未夠秤嗰啲，其實唔係人嚟的。英國已經大把人（當然係後生仔）話應該降到 14 歲。而更搞笑嘅係，投票年紀有下限，但，冇上限！只要你看似（邊個知？）唔係十分神智不清，80 歲都可以投。其實，憑乜覺得 80 歲嘅有得投全票，14 歲嘅就零票？人嘅智能，照計去到某個年紀，會變到衰過 14 歲。

本文絕非提倡 weighted vote，但呢樣一路只係蛋頭學究討論嘅嘢，會愈嚟愈多人講，甚至有機會見到成真。到時你就知我係先知。在此以前，當然有人會諗咩倫敦立國，甚至有識之士金融才俊都想立國，唔好同啲反智阿叔一齊癲。之但係，當然講就易啦。才俊立國，邊個掃垃圾？Ok，請外勞。咁邊個從軍？我在股壇拎開鑊鏟炒股票，你叫我去拎槍？定僱傭兵咁化學？你點知佢唔會掉轉槍頭搶你錢？而家，其實啲脫歐選民，咪做緊差不多嘅嘢囉。

（本文純屬作者意見，不代表香港01立場。）