呂慧儀愛子參加遊學團腸胃炎入院　解釋出Po原因：接觸唔到校方

呂慧儀（長腳蟹）10歲愛子「蟹籽」早前參加內地遊學團，全團多名學生不幸爆發急性腸胃炎，惟學校處理方式令多名家長不滿，呂慧儀在社交平台分享家長群組的對話內容，促校方儘快交代。

今日（12/11）長腳蟹現身電視城出席無綫處境喜劇《愛·回家之開心速遞》宣傳造勢活動，就事件接受《香港01》訪問時表示：「而家囝囝冇事好返晒，而當時點解我會出po，起初我以為得我個小朋友先有事，發覺原來其他家長嘅小朋友都有咁嘅情況，喺咁嘅情況下，我係好無助，唔知點樣去處理，係接觸唔到校方。事後理解到當時校方可能要上報去衛生署及教育局，變咗未能即時可以同我哋家長解釋得到咁多。不過校長係好好，當佢知道家長嘅憂慮，佢都即刻打俾每一位嘅家長，呢個係一個好好嘅做法，起碼家長們可以得到個安心，同埋多咗資訊，我哋家長可以點樣去配合同埋點處理。而家校方係做得好好，會做咗好多啲衛生措施，要學生遵守。」