占卜師羅泳嫻唔怕老公出軌：佢唔敢亂嚟塔羅牌會揭到出嚟

塔羅牌占卜師羅泳嫻（裸泳）今晚（11/11）現身電視城出席TVB Plus《直播靈接觸》 直播節目。羅泳嫻受訪時透露，雖然自己身為占卜師，但不會無時無刻都會為自己占卜問事：「其實有啲黑日嘅時候，嗰啲日子我就唔會占卜，同埋嗰啲黑日我都盡可能都唔會出門就係真囉。但如果有啲大決定例如買賣，又或者影響你將來嘅決定，我全部都會揭一揭牌。（你識老公時有冇占卜？）其實我哋大家認識咗之後，我先去揭牌，如果我哋冇感情基底，我揭到呢個人有幾好，但我唔鍾意佢都冇用，同埋塔羅牌係知道人哋會諗咩嘢。（咁你有冇用嚟睇你老公諗啲咩嘢？）咁又唔會，好信得佢過，但佢都唔敢亂嚟，因為佢老婆我係會揭塔羅牌會揭到出嚟，哈哈！」