陳百祥回應「分家」不和傳聞句句有骨落地 竟然稱呼阿麟做譚生
撰文：吳子生
出版：更新：
陳百祥今晚（4/11）現身尖沙咀出席《2024EYT好友會聯歡晚宴》。對於有指他自從上次「踢人事件」後與隊友鬧不和，隨後再沒有現身香港明星足球隊，相反更高調與王晶自組另一支球隊「精裝足球隊」疑似分家。
陳百祥接受《香港01》訪問時就事件回應：「佢哋練波一星期只係練一日，我就一星期踢四日，大家都唔同，而我香港就有四隊波，咁我舊時係踢職業，大佬佢哋唔係，你唔可以要求佢哋38年後跟我一樣，個個都大咗年紀，你叫阿譚生踢90分鐘，咁無可能，你睇我同佢身形就已經知兩回事。」
對於被傳不和，阿叻否認：「冇不和。佢哋係踢啲容易啲嘅足球，我鍾意踢啲有競爭性。（佢哋係老鬼波！）唔好咁講，個個都係老鬼，咁有人會退化，有人冇退化。（你冇退化？）我冇退化過。精工有一球都係我入，我係職業㗎大佬，我唔係玩，佢哋係玩㗎。（即係大家級數唔同啦！）唔咁又唔係級數唔啱，我只係搵啲級數同佢哋唔同，我只係搵班後生咁解啫。其實我想踢認真啲，先至整多隊啫。（就係你過分認真先踢人死腳！）踢波唔認真，咁你去打羽毛球，又或者打乒乓波囉。」