黑色月光｜尹揚明內地拍江湖片懶理內地上唔到映：我唔係做製作

尹揚明（尹佬）今晚（28/10）現身尖沙咀出席無綫台慶劇《黑色月光》首播宴。相隔23年強勢回歸無綫拍劇，尹佬接受《香港01》訪問時表示：「當初佳哥（鍾澍佳）搵我嘅時候，我都問佢我係咪演反派，佢就話我個仔先係反派，咁我就話咁都好呀，就係咁我就接咗。（唔想演反派，係咪想轉戲路？）咁又唔係，其實咩角色都得，但最主要都係要睇吓自己有冇得發揮。（內地有冇咩片種唔拍？）其實我咩都拍，我又唔會話唔怕江湖片，始終我都係職業演員，我就唔理部戲拍完上唔到映呢個問題，因為我唔係做製作。賣唔賣片嘅就唔關我事，最緊要係做好自己嘅角色就夠，咁所以咩角色我都會拍，但要我除衫嘅我唔就唔拍啦。不過都係嗰句有我拍就拍，唔啱自己就唔玩啦。」