李文標曾於台慶發生意外致半身癱瘓 事過境遷與無線關係友好
撰文：鄺鈺瑩
出版：更新：
李文標曾在無綫台慶表演跳彈床不慎發生意外而半邊身癱瘓超過半年，其後因不滿公司處理手法而未有與公司續約。李文標絕迹幕前多年，不過昨日（20日）同老婆胡櫻汶出席麥翠嫻愛女婚宴時，就話自己一直活躍幕前，去年參與電影《爆裂點》拍攝，與張家輝第一日開工就在和合石，拍完之後瘦咗幾磅。「我同老婆一直有舞台表演，有去國內、雲頂，又有喺國內酒吧唱歌。」
問到身體狀況如何，李文標表示疫情後有變差，但一直有透過中醫調理。而問到與無綫關係，是否有機會再合作，他說：「嗰一代嘅人已過去，好多工作人員都轉晒，志偉哥本身都係武師公會（香港動作特技演員公會），嘉樂哥又咁熟，如果有機會咪去《獎門人》玩囉，同埋我哋每年都會幫武師公會唱歌，所以關係其實好好，我仲有唱畀志偉哥聽。」