企業強人｜尹詩沛激減8磅做反骨秘書好值得　不捨「御用妓女」

尹詩沛喺《企業強人》飾演「雙面秘書」成功引起網民關注，今日她現身尖沙咀與張曦雯、譚俊彥、龔嘉欣等人為劇集進行宣傳。

尹詩沛曾表示為了「程璐」一角而1個月激減8磅，如今成功獲關注是否減得值？她說：「值，因為減肥不嬲都係持久戰。當時都係運動同戒糖、戒澱粉，其實再落多幾磅會更好，但而家睇落有啲肉哋都OK。」劇集播出後，尹詩沛表示收到不少DM指她黑人憎，觀眾如此入戲，令她感到十分開心。

尹詩沛表示今次較多內心戲，但由於準備時間較多，所以過程順利。尹詩沛曾被封為「無綫御用妓女」，如今升呢做秘書，她笑言有少少唔捨得妓女角色，仲話有機會的話想做「媽媽生」，因為自己經驗豐富，所以一定會做得十分稱職。