周吉佩讚莊子璇歌聲甜美 下月開騷網民寸無人識：一定有人唔識我

周吉佩（吉吉）和莊子璇（Hilary）今日（15/10）現身電視城出席《J Music》節目錄影。Hilary剛卸任港姐冠軍後工作不斷，今次再參與主持工作分外興奮：「今次能夠同一班專業歌手一齊做節目好開心。尤其記得我認識吉吉嘅時候，大家喺一個活動上面認識，然之後佢又開唱歌班，於是即刻問佢我可唔可以唱，吉吉佢好好，佢話隨時歡迎。」吉吉接著笑說：「佢係有話嚟，但到今時今日佢都未嚟過，你話係咪俾佢激死。不過頭先聽佢唱歌，佢把聲係好甜，之前我都有同佢傾過，揀咩歌佢最合適，我就覺得揀一啲比較甜嘅歌，佢最適合。」

提到他下個月開出道16年首場個人演唱會，竟有網民在社交專頁《將軍澳主場》發文指無人識周吉佩，惹起熱話。吉吉表示：「咁啱一定有人唔識我嘅，反而我係要多謝佢。成件事好得意，佢唔識我，但又出呢個Po，變相佢係咪相識我呢？咁我都有留言俾佢哋，多謝佢哋出呢個Po，令我有更加多人認識。其實我就冇乜所謂，唔識可以了解下，如冇興趣嘅，咁啱行過嘅咪望兩眼囉。」