黎燕姍呻湊孫辛苦過拍劇　為百日宴準備定重手金鏈

黎燕珊今日（2日）為中國文化藝術傳承協會第一屆董事就職典禮擔任主持。剛榮升婆婆嘅黎燕珊心情大好，透露為湊孫女連朋友都少約。「佢而家返嫲嫲屋企兩日，但我已經心掛掛，成日都打俾個女問我嘅蜜芽公主點。」

黎燕珊表示為減輕女兒負擔，所以舉手幫忙，但因為孫女不時扭肚痛，所以搞到大家無覺好瞓。「但我都感恩，因為隔咗30年，自己個精讀班都仲Ok，有95分。所有回憶返晒嚟，係開心嘅回憶。」而為咗孫女嘅百日宴，珊姐亦已準備份量十足嘅金鏈，而吊墜係當年女兒出世時親戚送增，如今傳承到孫女手上，十分有意義。「教育基金我都預咗，你而家辛苦將來快樂，我以前又係爸爸又係媽媽，都咁湊大佢。」

黎燕珊大讚孫女手長腳長兼靚女，仲話2048年港姐一定係孫女，問到有無鼓勵女兒再生多個，她說：「佢唔肯，我經歷完呢個半月都好辛酸，仲辛苦過我拍戲十萬倍，真係好辛苦。我已經畢業㗎啦，之後再去都係興趣班。」