李龍基爆王青霞明年7月放監即遣返內地　獄中暴瘦：成日掛住老公

李龍基（基哥）今晚（28/9）現身尖沙咀出席前《警訊》主持麥振江女兒麥詩敏的婚宴。被問到中秋節有否到獄中探望未婚妻王青霞時，基哥表示：「而家佢心情平靜咗好多，因為都已經係事實，咁所以都接受咗。而另一個問題係佢有一個目標，就係第二年嘅2025年嘅7月7日，佢就可以重獲自由，到時候我就可以同佢共同生活。（到時放監直接遣返內地？）無錯，暫時要返去大陸，唔可以落嚟香港住。等我哋結婚之後，改變咗身份後，再從正途去申請，相信會有機會嘅。」

基哥又指將會同王青霞在內地結婚：「日子就未定，因為大把時間，唔使急，計劃就係咁。（王青霞瘦咗十幾磅？）係呀，都冇計，因為入面食就清淡啲啦，又多啲勞動，同埋成日掛住個老公係差啲。（基哥你開心咗好多，精神又好咗！）係，比之前好咗好多，而家我都寄情返飛機模型上，變咗唔需要諗咁多嘢，得閒睇吓佢嘅相咁。（習慣照顧自己未？）麻麻地，佢好擔心我嘅衛生問題，就好似床鋪嗰啲床單咁，我都唔知放咗喺邊度，我都未得閒換過，不過我都會努力嘅。」