麥詩敏結婚｜大讚老公體貼細心　爆爸爸麥振江恨抱孫：佢係有暗示

前無綫新聞台首席主播麥詩敏（Gloria）今日（28/9）與拍拖10年的圈外男友何澤彬正式拉埋天窗，晚上於尖沙咀酒店筵開29席廣邀親友分享喜悅。晚上6時許一對新人現身會見傳媒，新娘子麥詩敏身穿低胸珠片高衩長裙，相當貴氣。

麥詩敏在接受《香港01》訪問時大讚老公何澤彬為人體貼細心：「頭先聽到愛的宣言度，聽到佢講係好真情，因為十年冇聽過嘅說話頭先係聽到，咁所以係好感動。同埋之前成日要佢唱歌畀我聽，因為怕醜都唔肯，但佢今日會喺台上唱歌畀我聽，我係好開心。（爸爸有冇話想抱孫？）爸爸佢係有暗示，但就冇直接迫我哋嘅，但會感覺到佢係想抱孫。」

新郎何澤彬續說：「我哋都鍾意小朋友，都抱住開放嘅態度，都係順其自然，同埋都要睇佢嘅工作狀況。（籌備婚禮緊張瞓唔着？）今朝5點幾先瞓，一瞓落床，7點幾又起身，根本就冇瞓過咁，因為太過緊張又期待。（婚後係咪將自己人工畀晒太太？）呢個係有應承過佢，咁所以絕對係冇問題，係好透明嘅。」