外賣員送餐問客借廁所 遭拒絕後上網怨冇人情味 網民卻有不同看法

最近有外賣員指日前接到訂單後感到好急尿，送到上去顧客家中時提出借廁所要求遭到拒絕，顧客卻即刻關門，因而被外賣員鬧無人情味，但網民們見到經歷後似乎不太認同！

外賣員送餐問客借廁所 遭拒絕後上網怨冇人情味 網民卻有不同看法

有外賣速遞員在Facebook群組「(香港)送餐/送貨員意見交流區」內分享經歷，稱日前送外賣時「等你個焗飯等咗20分鐘，已經超急尿，ok，送埋上去俾你，急到就嚟爆，問你可唔可以俾我去個廁所，竟然即刻閂門？俾少少人情味好唔好？」大怨顧客不願借廁所行為無人情味！

外賣員發帖後得到不少迴響，不過網民似乎不太撐這個人情味的講法，認為顧客不借出廁所好正常：「下，好正常喎，三唔識七點會無啦啦比人入屋」、「點知你係唔係爆格㗎，咪玩啦！等成廿分鐘都唔去廁所？」、「個個都話人情味咁咪變公廁？」

有網民亦指出由於疫情，顧客拒絕外賣員入屋要求其實好正常：「依啲時候叫得外賣就係唔想同其他接觸！」

有疑似外賣員在留言點出外賣員三大守則：「唔入屋、唔上酒店、村屋唔入村」獲不少網民讚好認同，並建議「我理得佢（顧客）個餐有未，急起上嚟都要搵個乾淨廁所去埋先。叫外賣唔洗等呀？」、「我建議你以後有小小尿急感覺就要去定先，啲餐聽唔會體諒你等幾耐，送餐遲啲唔會話你嘅！呢啲係我經驗！」

外賣點餐平台設立了除了不可入屋等保護顧客的守則外，亦設有不少保障外賣員權益的指引，例如限制行樓梯樓層、等候時間過長可刪除訂單等。早前有顧客要求外賣員步行樓梯送餐至7樓時遭外賣員拒絕，同樣引起網民關注。