【Apink演唱會】寶美跳《My My》跌親　恩地：我會掛住你哋

《2017 Apink Asia Tour [Pink UP] in Hong Kong》昨晚已經完滿結束，多次來港嘅Apink 6位成員初瓏、恩地、寶美、娜恩、南珠和夏榮，成晚不停大曬廣東話！冧死香港Panda（Apink粉絲）！

Apink自爆其實佢哋好鍾意香港，成日都好想嚟。上一次亞巡以香港作為尾站，今次亞巡就以香港作為海外首站開始巡演，證明佢哋好錫香港Panda。而初瓏仲自爆早前秘密旅行，其實係佢同朋友嘅首次海外旅行，就係嚟咗香港喇！

Apink成日嚟香港同香港Panda見面，梗係唔少得學埋廣東話冧香港Panda啦！識做嘅寶美又話淨講「多謝」唔夠，Apink仲一齊用廣東話講：「我愛你哋！」而聽到Panda震撼嘅歡呼聲，Apink表示真係好值得一年嚟兩次啊！

講到Apink近況時，初瓏就同VIXX成員赫拍緊網絡電視劇，初瓏表示：「好耐冇拍戲，覺得緊張同有啲驚。而且隔左好耐先拍戲，所以我都好努力咁準備，套劇叫做《Romance特別法》，10月中就會開始播，大家記得要支持啊！」而寶美都有拍劇，仲話個角色係做返佢自己。恩地同樣都有拍劇，角色仲要係做富川嘅檢察官，又講到：「雖然今次出演嘅劇集比較沉重，又要查案，但我就唔係個好陰沉嘅既角色嚟嘅，其中介紹自己係檢察官個時都好型㗎！

當Apink回歸初心跳《My My》時，未知寶美係咪太激動，唔小心跌親，唱完個陣恩地仲笑佢話佢啱先好足球嘅守門員。不過愛錫隊員嘅恩地就同Panda講：「如果你地頭先有影到寶美跌低嘅相嘅話，就......唔好上載喇...因為呢啲相會對寶美造成苦痛。」

去到Encore時，Apink突襲出現係台下，同Panda近距離接觸，恩地仲話你哋估唔到我哋會係嗰到出現呢？Apink又繼續大曬廣東話讚Panda「你哋好勁，我會掛住你哋！下次再見，多謝！

我哋01韓迷嘅facebook專頁Kpop 01已經開咗喇！想知道更多韓國娛樂、飲食、玩樂、時尚資訊，快啲去畀like啦：https://www.facebook.com/hk01.kpop/