盜月者｜與盧瀚霆登神合體謝票 觀眾等睇呂爵安PatPat找數佢咁答
撰文：鄺鈺瑩
出版：更新：
《盜月者》兩位主角盧瀚霆（Anson Lo）同呂爵安（Edan），今晚（17日）聯同導演袁劍偉現身尖沙咀戲院進行謝票，主持問到電影口碑及票房都好好，會否有拍續集打算，袁導表示︰「第二集有無聲氣要睇大家，唔係話有就有。」並謂最重要都係睇票房。
謝票期間，有觀眾表示等睇Edan為票房找數派福利，露Pat Pat ，呂爵安即時更正：「係八月十五啫，無話Pat Pat。」袁導演聽到都忍唔住問八月十五唔係代表屁股咩？Edan解釋：「八月十五係月亮嚟㗎嘛。」話題之後發展到新月、半月，Edan 即時轉移話題，十分鬼馬。
有觀眾問到Edan 同Anson Lo最喜歡對方哪一場戲，Edan表示最喜歡阿佑（盧瀚霆 飾）同媽媽嘅對手戲，因為能夠感受到母子之間嘅感情十分深厚。而Anson Lo則揀選Edan第二次見萊叔（姜濤 飾）以及之後發脾氣鬧人一場，因為兩場嘅反應都十分真實。另外，袁導亦親解《盜月者》無女主角之謎，他指《季前賽》因加插女主角之後有點混亂，汲取經驗後，今次幾乎全男班上陣。