四川戲院驚現打邊爐加睇戲　200人仔有找網民最擔心一件事

新冠肺炎疫情已過，大家又可以如常入戲院一邊食爆谷飲汽水一邊睇戲，想不到戲院餐單原來已經昇華到可以打邊爐，近日小紅書瘋傳四川某間戲院可以淥住肥牛欣賞電影，各位戲迷又接唔接受到呢？

據小紅書流傳的圖片所見，這家四川戲院提供一人一鍋打邊爐給每位入場睇戲的觀眾，見食材相當豐富，有肉有菜有海鮮，鮮紅湯底似是麻辣口味，仲有醬料佐料提供，驚現場太黑睇唔清材料熟未？冇問題，枱上面有一盞小燈等你睇得一清二楚。

據悉，一餐火鍋加睇戲都只係叫價188元人民幣，網民對這個安排呈兩極意見，不少人表示躍躍欲試，亦有一批人認為咀嚼聲音與濃烈氣味令人未能專心睇戲，更有人指出「好怕後腦勺被燙」，笑言坐最後一排最安全。